Kan kawngpui siamtute hi

Saitual leh Saichal inkar kawngpui ELTY-in an siam mek chu tun hnai khan YMA Sub Headquarters, Saitual chuan a hmunah an endik a, an hnathawh dan chu ṭha tawk loah ngaiin an lawm lo hle.

Central YMA hian kumin kum tir lam khan PMGSY hnuaia Mizorama kawngpui siamte leh kawngpui siam lai ṭhenkhat chu group ngaah inṭhenin an tlawh a, chutah chuan an lungawi loh thu leh an rilru a nat thu an sawi. CYMA president chuan, “Contractor ni lo contract hna thawk an tam a, official-ah chuan an hming lang kher lo mahse, politician-te pawh an inrawlh a ni tih hi kan han hmuh chu a ni,” tiin a lo sawi tawh.

CYMA lamin kawngpui siamtu zingah midang hming hawha hnathawk politician an awm tihte pawh an sawi lang hial tawh a, hetiang mite hi an la inthiar fihlim lo a nih chuan an hmingte nena tarlan law law a ṭhat tawh hmel a; kan ram hmasawnna ruhrel (infrastructure) tur hi politics-a induhsakna thilah kan chantir zo ang tih a hlauhawm khawp mai.

CYMA-in an lungawi loh thu an sawi hnu lawk hian Chief Minister leh Central YMA office bearer-te chu kawngpui siam chungchangah an inkâwm zui a; kawng siamtu zingah thawk ṭha lo leh thawk thei lote chu insawifiah tura hriattir a, lungawina a awm loh chuan hna thawk thei lo tura puan (black list) an rem ti a ni.

Tunah kawngpui siam ṭha lo a lo lang chhuak leh ta a, hei hi CYMA lamin engtin nge an tih dawn a, Mizoram sorkarin engtin nge hma a lak zui dawn tih mipuiin an thlir reng dawn.

Kawngpui a ni emaw, buil­ding sak emaw, lei dawh thlengin a nih dan tur ni lo leh chhe lutuk maia thawk an awm fo hi chu mipui zahlohna a ni a, chu mite hrem duh/ ngam lo sokar chuan mipui hma a ngai lo a tih theih bawk ang.