MLA lakluh dan kha

Serchhip by-election-a thlan tlin Lalduhoma chu tun hnai khan Assembly Annexe conference hall-ah rinawmna thu tiamtirin Member of Legislative Assembly ni turin Mizoam Assembly Speaker chuan a lalut. Lalduhoma lakluh inkhawm neih hma hian a hmun ngaiah vek hian Speaker hian press conference a ko a, press conference an zawh hian MLA lakluh inkhawm hi neih zui nghal a ni.

Hri leng karah, lockdown kalpui a ni chungin Speaker-in MLA thlan thar lawm luhna inkhawm a buatsaih thei hi a lawmawm a; thlan tlin nih hnua lakluh loha awm reng hi thil nuam a ni dawn lo a, hun harsa tak kara Speaker-in remchang a zawng hi a tiṭha hle. Lakluh inkhawm pangngai ang lo taka press conference-te nena inchawh pawlh deuh taka kalpui a ni leh, inkhawm urhsun leh ûp tak tura ngaiha fiamthu nena thil kalpui a tam lutuk erawh sawi zui a hlawh hle.

Lockdown lai mah ni se Speaker hian press conference hi a ko thiang a, MLA lakluh chungchang puangzar lehtu tur an nih tho avangin thuthar thehdarhtute koh khawm hi thil remchang tak pawh a ni mai thei a; nimahsela MLA lakluh nena hun bichilh lutuka thil a kalpui leh, subject hrang hrang a sawi daihte kha a inhmeh lo deuh a, tun hnua tihnawn tawh loh atan a ṭha khawp mai.

Assembly Budget Session neih zawh taka sawi hlawh tak, Congress member Ngun­lianchunga leh MNF mem­ber TJ Lalnuntluanga-te Assembly House bathlara an intin uaih uaih lai video han tlangzarh hnuhnawh te, MNF member sangha bomb-a puh H Lalzirliana chungchang a kalpui dan leh, social media kan hman dan a ngaimawh thute leh Mizoram police-te an ṭha tawk ta lo ang maia a ngaih thu a aupuite kha MLA lakluh tur nen a inzawm lem lo a, press mite hmaah khatiang thil kha a sawifiah duh a nih pawhin hun remchang dang zawng zawk se a inhmeh ang.

Hei bakah hian a MLA lakluh tur nena lakluh inkhawm buatsaih hun sawia an 'fiamthu' chung­chang a sawifiah zing lutuk leh, MLA lakluh a nih hnua dawhsana an la dinlai ngeia MLA thar a fiam te kha a dinna hmun zahawmna nen a inhmeh lo a, khatiang kha inkhawm zahawm taka chin chhunzawm loh atan a ṭhat hmel.

Tun hnuah MLA lakluh a nih hma emaw, lakluh a nih hnuah emaw press conference a awm leh dawn a nih pawhin dawhsan (platform) thuhmun ni loa tih ni tawh ṭhin se, a remchang a nih chuan hall hrana tih ni hram tawh se, MLA lakluh inkhawm hi chu urhsun leh zahawm taka kalpui a inhmeh a ni.