Bawlhlawh sawngbawl hna

Aizawl khawpui bawlh­hlawh sawngbawl hna chu khawl ṭha leh changtlung zawk nena kalpui a nih tur chu Aizawl Mayor chuan a sawi a, mipuite chu bawlhlawhte thliar hram hram turin a sawm.

Mayor chuan Aizawl Municipal Corporation inthlan dawna political party ṭhenkhatin bawlhhlawh sawng­bawlna hmunah an thliar lo, an tih chu a dikna chen a awm thu sawiin a hmunhmain a dawl zawh loh avangin hmun khata bun chin a awm tih a sawi a, chutih rualin ṭha taka an thliar sa a nih chuan thliar hran a awlsam phah thu sawiin mipuite'n bawlhhlawh thliar uar se a duh thu a sawi.

Aizawl khawpui bawlhhlawh paih an sawng­bawlna hmunah ber bawlh­hlawh ṭawih thei leh ṭawih thei lo an bun pawlh leh vek tia party ṭhenkhatin an sawisel chu thil dik lo a ni lo tih Mayor thusawiah hian a chiang ta a, chutih rualin mipui a ngenna erawh zawm hram ni se a lawmawm hle ang.

Thil hi politics-a thu inchuh a nih chinah chuan a dik ber hriatthiam a harsa ṭhin a, AMC inthlan dawnah kha chuan bawlhhlawh hi thliar fel a nih thu sawi pawl an awm a, thliar loa hmun khata bun pawlh vek a nih thu aupui an awm bawk a nih kha.

Engpawhnise thu kal tawha inumzui mai loin, tun aṭangin engtin nge awmze nei zawka bawlhhlawh hi sawngbawl a nih theih ang, tih hi ngaihtuah a ṭul ta takzet a ni. Mipuite bawlhhlawh thliar fel ṭha tura kan duh chuan a sawngbawlna hmun­ah pawh tun aṭang chuan paih pawlh tawh loh tur a ni a, mipui lam chauhin bawlh­hlawh an thliar chuan awmzia a nei thui dawn lo a ni.

Tunah chuan thil awm dan a chiang tawh a, AMC lamin khawl ṭha zawka bawlhhlawh sawngbawl an tum a, mipuite bawlhhlawh thliar ṭha turin an ngen leh bawk a, khawpui bawlhhlawh paih hi awmze nei zawk leh fel fai zawka kalpui turin mipuiin AMC-te ṭha takin i thawhpui ang u.