Hri do laia sorkar chet dan

ZPM Ṭhalai chuan thu­chhuah siamin Mizoramah Covid-19 hripui a lenlai leh sorkar pawhin hripui dona tura a hnathawkte hnena kut a dawh laia mau chi supply-tu tur zawnga tender chhuah chu a inhmeh lo an tih thu an tarlang a; hei bakah hian SEDP sum aṭanga kawng leh railing siamna cheng nuai 63 chhuah pawh a hun loa an hriat thu an sawi.

Politics-ah hi chuan roreltu lamin thil an tih hi eptu party lam hi chuan an dodalin an sawisel fo a, thil zawng zawng dodal leh sawisel vek erawh a puitling zia bik lo ang. Tuna sorkarin mau chi supply tur a zawng hi sorkar thlirna aṭang chuan a hunlai (season) a nih avanga tender chhuah pawh an ni thei a, chutiang lam chu thlirpui a ṭha a; kawng leh railing siamna tura cheng nuai 63 pek chhuah pawh hi a mamawhna a sang (urgent) viau a nih chuan thil sual a ni chuang lo ang.

Hemi lehlamah chiah hian sorkar kalphung ṭhenkhat hi chu mimawl ber pawhin an hmuh fiah theih tur khawp hian a inkawkalh ṭhin a, sorkar hnathawkte sum a dil ni taka thil danga pawisa lo pek chhuahte hi a inhmeh ber lo.

Kum 2020-ah Covid-19 hri kan hlauh vanglai takin mau/raw chi supply turin tender chhuah a ni tawh a, mi pakhat chiahin a chhang zui a ni. Tunah hripui avanga kan inkhar­khip lai tak bawkin mau chi supply tur zawnna an han chhuah leh ngat hi chu mipui zah lohna ang zawnga sawi duh an awm a nih pawhin thil mak a ni awm lo e.

Eptu lamin an aupui reng chu 'SEDP-ah sorkarin sum a dah a, hei hi a hmanna awm sa a ni lo a, sorkarin a duh chuan hri dona atan pawh hman theih a ni,' tih hi a ni. Tun thleng chuan sorkar hian a pawisa khawl (dah ṭhat) hi hripui dona atan a la phawrh lo a; sorkar laipuiin hri dona tura a pek bakah pawisa awm sa leh sorkar hnathawk leh mipuite thawh khawm a hmang a ni ber mai.