Mi harsate chhawmdawlna lam
Covid-19 hri leng avangin Mizoram sorkar chuan total lockdown chu May 24, 2021 thleng a pawt sei leh a, sorkarin inkhuakhirhna a puan aṭangin thla khat zet chu a awh dawn ta ni.
He hripui hian mirethei leh harsate harsatna a belhchhah a, chutih rualin mi hausa zawk kan tihte pawhin an tuar na hle. Nitin inhlawh chawpte an khawngaihthlak takzet a, thla khat zet hna an thawh theih loh chuan chhuanchhama awm pawh thil awm thei a ni; hemi rual hian mihausa zawk nia kan ngaih sumdawng liante leh nitina pawisa khawih che ṭhinte hloh pawh hi a ṭhahnem tham hle ang.
Hetihlai hian sorkar lam chuan chhawmdawlna pawisa hi a la sawi ri lem lo a, chhawmdawlna hna thawk thei dinhmunah a ding lo pawh a ni ang. Mirethei kan tih zingah hian thingtlang lam hi chu a tuar na lo zawk an ni mai thei a, a bik takin khawpuia mirethei (urban poor) nitina an hnathawh chhuah zel ei ṭhinte tan chuan thla khat zet hnathawh theih loh hi a rapthlak hle a ni.
Mi harsate tana inpe phal tak tak mimal, pawl leh kohhrante awmin an luangchhuak ṭhin a, khawtlangin mi harsa zual an ṭanpui chang pawh an awm. Hetiang hunah hian sorkar hian khawi aṭangin emaw ṭanpuina tur hi ruahman thei se, a mamawh zualte tana chhawmdawlna pe thei sorkar nei ila a lawmawm hle ang.
Tunah hi chuan hripui dona tur ngawr ngawr sum pawh nei lo ang maiin kan sorkar hi a awm a, chutihlaiin budget lam en chuan ruahmanna dangah sum ṭhahnem tak dah a la ni tho a, tun hi mirethei leh harsa zawkte tana sorkar a chet chhuah hun a ni dawn lo'm ni?