Khawpuia miretheite dinhmun
Health minister hoa mi pawimawh ṭhukhawm chuan, Aizawl Municipal Corporation (AMC) huam chhunga inkhàrkhip chu November 9, 2020 zing dar 4:30 thleng pawhsei an rél.
Aizawl khawpuiah kar hnih chhung lockdown kalpui a ni dawn ta a, Covid-19 vei hmuh chhuah thar awm dan thlir chuan lockdown hi thil ṭul tak a ni a, chutih rualin mirethei leh harsa zawkte dinhmun en erawh chuan thil huphurhawm tak a ni. Lockdown a ṭhat zawkna sawi duh chuan thui tak sawi tur a awm ang a, lockdown loh avanga kan buai theihzia leh miretheite hi a tuar nasa an nih theih dante pawh sawi tur a awm ngei ang. Chutih rualin lockdown pawh a sawt tawh vak lohna lai leh miretheite tawrhna nasatzia lam pawh thui tak sawi tur a awm ang.
Covid-19-in na taka a khawihte hi miretheite chauh an ni lo a, mihausa kan tihte hlei hlei hian he hripui avang hian an chân hnem ang. Khawpui dawrkai lian zinga nitin mamawh zuar ni lote hian an hloh tam tawh takzet a, lirtheia eizawngte an rûm a, hotel leh restaurant neitute'n an tuar nasa a, an sum hloh zat hi chhut thiam pawh a harsa tawh hial ang. Miretheite tawrhna pawh sawi nêp theih a ni lo, an intunnunna tur leh an neih chhun pawh an hman ral tawh avangin chhungkaw tam tak chu pûk chawpin an nung tawh a ni.
Sorkar hnathawkte hi lockdown tuar lo ber an ni mai thei a, an hlawh a kiam lo a, nitina an veivah tlem na na na chuan lirtheia an chuanna senso leh pawn lama ei leh ina an senso thlengin a tlahniam a, thawmhnaw mamawhna a lo tlahniam bawk nen lockdown a rei poh leh an inkhawl thei dawn ti pawhin a sawi theih hial ang.
Dinhmun inang lo taka mipui an awm lai leh thutlukna lian tham siam hma hian 'miretheite dinhmun' lam hi thlir tel fo a ṭha ang. A reltu zinga mite hi a taka tuartu an ni lo mai thei a, hri vei kan hmuh tama a la hlauhawm chhung inkharkhip chhoh ngar ngar ringawt pawh hi thil finthlak ber a ni lo palh ve thei bawk.
Khawpuia miretheite dinhmun thlir hian kan sorkar hian chhawmdawlna tur ruahmannate siam tel thei se a duhawm hle. Khawpui enkawltu UDPA department hnuaia lirthei dahna PAHOSS-a sum an dah hnem theih dan thlir hian, khawpuia miretheite hi sorkar hian a ngaihsak tak tak a nih chuan lockdown avanga an tawrhna tlem tala phuhru turin ruahmanna a nei tel thei ngei ang.
Engpawhnise kan ram hruaitute hian he hun harsaah hian ram tana ṭha ber tur nia an ngaih angin ro an rel a, chu chu mi zawng zawngin an ṭhatpui phak lo a nih pawhin mi tam zawk tana ṭha tur a nih chuan sawisel mai loa kan pawm thiam a ngai a ni.