Sorkar hi hriatthiam a ngai

Khawvel tibuaitu Covid-19 hri chuan kum khat chuang zet mai Mizoram pawh a chen chilh ve ta a, hnathawk hleithei loin mipui leh sorkar pawh hun rei tak chhung an awm ta. Mizoram sorkar pawhin a ruahmanna hrang hrangte tih theih loh leh tihkhawtlai a nei nual ang.

Covid-19 hian mihring hriselna a nghawng a ni mai lo a, sorkar sum leh pai pawh na takin a nghawng a, hei hi buaina belhchhahtu chu a ni. Sorkar laipui aṭanga sum lo kal ṭhin a tlahniam bawk a, ṭum danga sum hman ṭulna ni ngai loah sorkarin sum a hman a ṭul ta a, tha leh hun tam tak a sen a ngai bawk; sorkar hi a khawngaihthlak hle a ni.

Hei vang hi a ni ang sorkar ngei pawhin zah pawh dawn loin hmun hrang hrang aṭangin sum a dawng khawm mek a, state pawn leh ram pawn aṭang hialin ṭanpuina a dawng a; Mizoram mipuite'n mahni remchan ang tawk tawkin Chief Minister's Relief Fund lamah sum an chhung khawm a, sorkar hnathawkte hlawh dil hial pawh tlawmah la thei lo khawpin sorkar sum dinhmun hi a tlachhia a ni ta ber mai.

Hetiang hunah hian sorkar tan pawh awm dan thiam a harsa dawn a, hripui dona lam ringawta pawisa neih ang ang hman zawh ṭhak a rem lo ang a, chutih rualin hripui avanga thi leh damlo an pun belh zel lai, sorkar hnathawkte hlawh hial a dila an dil tawhlaia hna dang lo rek chiam pawh a hun ber lo ang.

Hmasawnna hna ṭhenkhat hi kalpui loh theih loh chin a awm a, hna ṭhenkhat hi tihkhawmuan hleihtheih loh a awm tih hi mipui pawhin kan hriatthiam tlan a ngai. Sorkar lamin hripui len lai pawha a thawh loh theih loh chin a awm tih hi pawmpui thiam a ṭha ang. Chutih rual chiah chuan sorkar hotu ṭhenkhat pawh sum tamzia sawi kawngah insum se, project ṭhenkhata sum tamzia sawia inhampuar pawh bansan hrih se, mipui mar dek chunga an kal thiam a pawimawh awm e.

Covid-19 hripui avangin sum a hek a, tha a hek a, hun a hek em em a, sorkar hi tun hmaa a inhman ngai lohnaah nasa taka inhmangin a insengso nasa tih hi mipuiin kan hriatthiam pui a ngai hle a ni.