Eptu lamte ngenna leh sorkar

Mizoram Pradesh Congress Committee vice president Lalsawta chuan Mizoram sorkar chu Rawmi chi (Dendrocalamus Sikkimensis seedlings) supply tura tender notice a tihchhuah tawh chu sût turin a ngen a, "Covid-19 hripuiin nasa taka min nuai lai, mi ṭhenkhat tlawmngaite'n an theih ang ang thawhkhawm a he hripui doa kan beih mek laia sorkar sum heti zawnga lo hman tum hi mipui pawh an zahawm hle," tiin sorkar pawisa chu mipui chhiah thawh khawm a nih anga a hman danah mipui mitmei vil ṭula a hriat thu a sawi.

Tun hnaiah ZPM Ṭhalaite pawhin sorkarin mau/ raw chi supply tura tender a chhuah chu a hun loa an hriat thu an lo tlangaupui tawh a, thil hmanhmawhthlak bik ni loa hmasawnna hna thawhna tura ruahmanna awmte pawh sût an duh thu an lo chhuah tawh bawk a ni.

Sorkarna vawnfung chelh­tute kutah hian sorkar sum hman dan tur hi a awm a, anni hian ṭul an tih angin an hmang thei. Covid-19 dona atan sum mamawh nia an hriat chuan budget bawm danga mi pawh an sâwk ṭhen thei a, a ṭul an ti lem lo a nih chuan 'sum indaih lo' tih chhuanlama hmangin mipui sum thawhkhawmah an innghat thei bawk a, he thilah hi chuan sorkar hian thuneihna sang tak a nei.

Tun hnaiah mipuiin sorkar che vel ngun taka an enthlak lai rengin Mizoram sorkar chuan Rawmi chi supply chu ṭul leh pawimawh nia hriain tender a chhuah a, hei lo pawh hi hnathawhna tur dangte pawh ruahmanna a siam a ni. Heng thilte hi a loa kan awm theih loh emaw, tuna tih loh chuan ramin a chhiatpui tur thil a nih chuan thuhran a ni a, a ni lem lo a nih chuan sorkar hian sût lailawk thei se a ṭha khawp mai.

Eptu lamte ngenna a nih vanga zawm duh loh leh ngaihsak loh ringawt chu a fuh ber lo thei a, sorkar hnathawkte hlawh hial diltu sorkar tan chuan fimkhur taka sum hman hun a ni e.