Aizawlah mihring inven ni se

Aizawl khawpui chhunga MLA-te leh AMC councillor-te chu tun hnai khan Health Minister hoin an inhmukhawm a, Aizawl khawpuia Covid-19 hri darh mek chungchang an sawi a; Aizawlah hri vei an pun chak em avangin 'Save Aizawl City' tih thupuia hman a hun tawh thu Health Minister chuan a sawi.

Tun hnaia total lockdown kalpui a nih hma aṭang tawh khan Aizawlah hian hun rei tak chhung chu zan curfew kalpui a ni tawh a, heng hunahte hian Police lam leh Traffic Police lamin an ven chu lirthei kal chhuak tur a ni deuh ber.

Tunah total lock­­down kalpui a nih hnuah pawh hian kawngpuiah mihring veivak hmuh tur an la awm leh ṭhin a, phalna nei lo pawh eng emaw zat an awm ngei ang. Police duty lam hi chuan lirthei veivak tur hi chu uluk takin an vil reng a, phalna nei lote chu dan angin pawisa an chawitir zel a; nimahsela mihring erawh lirthei angin an veng uluk lo deuh niin a lang.

Covid-19 hri hi mihring leh mihringa inkai darh zel a nih avangin ke-a kala leng chhuak turte ven hi a pawimawh em em a, ṭhianhoa len chhuah te hi in­kaidarh awlsamna a ni. Heti zawng hian sawi ta ila - lirtheia phurh neih loha chhuah aiin kea kala inzui hian hri kai darh a awl zawk a, mahni in chhuahsan loa tawm theih ni se a ṭha ngawt mai.

Police tan kea chhuak tur inven sen a ni lo a, anni lamin lirtheite ngun taka an vil lai hian, khawpuia LLTF lamin mahni huam chhungah mihring veivak tur hi uluk zawkin vil se, tun aia khauh deuha leng chhuak tur an ven theih chuan hri dona kawngah pawh a sawt ngeiin a rinawm.