Lui ram humhalhna thu kal zel

Mizoram lui 16-te kam tawn tawna metre 800 Riverine Reserved Forest (RRF) ni ṭhin chu January 27, 2021 khan Gauhati High Court, Aizawl Bench chuan a ṭhiat. Hei hi Mizoram sorkar chuan khin let a tum loh thu Assembly House-ah pawh an sawi chhuak tawh a; nimahsela Central YMA lam chuan hei hi khin let ngei an tum thu an rel ve thung. Mizoram sorkar pawhin khin let an tum thu an sawi ve leh tawh a, CYMA lam chuan Mizoram sorkar thu hi an ngaichang mek a ni.

Mizorama lui 16 kam tawn tawn ramte hi sorkar kuta awm loin mimal kutah lut ta ngat se, kan ram hmalam hun atan pawi nasa tak khawih theih a nih hmel a, Central YMA-in High Court thutlukna khin let a tum hi thil lawmawm tak a ni. Mizoram sorkar lam pawhin he High Court thutlukna hi pawm mai tur anga a lan hnuah khin let an tum niin a lang a, hei pawh hi thil lawmawm tak a ni.

He thilah hian Mizorama Mizo mipuite duh dan chu a chiang tawh a, Central YMA hmalakna hi an thlawpin lui humhalh duhna thinlung hi an pu hlawm a ni. Mizoram sorkar pawhin hei hi hriain lui humhalh tumin hma a la leh ṭan niin a lang a, Court-a thu inchuhah chak ngei tumin a theih ang angin ṭan la se a ṭha khawp mai.

Mizoramah ṭhâl a nain tui a vang a, hei vang pawh hi a ni ang lui ram humhalh duhna hi tun hnaiah mipuite thinlungah a tlana zual sauh niin a lang a, Mizoram sorkar pawh mipui duh ang ngeiin Court-ah kal rawh se.