Zirlai scholarship sem hun

Mizoram Scholarship Board (MSB) lam chuan pre-matric scholarship pek chhuah an tum tawh chu Public Finance Management System (PFMS) lam pawmpui loh bank pa­hnihah zirlaiten scholarship an dil avangin harsatna an tawk mek tih an sawi a, hei hi an tihfel theih hunah scholarship pek chhuah theih an inbeisei.

MSB lam sawi danin tunah hian zirlai 12,000 velin pre-matric scholarship an dil a, chumi atan chuan cheng nuai 460 vel an nei tawh a; zirlai 32,000 vel post-matric scho­larship doin chumi atan chuan first instalment cheng nuai 1,760 chu Finance department-in an kawl mek a, release order tichhuak turin an dil dawn a, sorkar pisa lam inpeih hun an nghak niin an sawi.

Zirlai ṭhenkhat chu scho­larship an lak loh pawha talbuai miah lo tura chhungkaw dinhmun ṭha an nih laiin, zirlai tam tak chu scholarship-a innghat niin an lehkha zirna tura midang pawisa puk chawpa zirte an ni a, an admission leh tuition fee-te thlengin scholarship lak huna rul tura inbe remte an awm ṭhin. Hei vang hian scholarship lak hun tihkhawtlai hian chhungkaw tam tak a tibuai a, hmanhmawh theih ni se a ṭha ngawt mai.

Harsatna lian ber nia lang PFMS lamin bank pawm loh an neih thute hi tun aia hriat hma theih ni se a ṭhat tehlul nen, scholarship sem chhuah tikhawtlai hial tur khawpin an pawm loh thu hi thuneitu lamin an hre tlai a, a zialo hle a ni.

Sorkar sum ṭhen­khat hi chu a hun taka dawn loh leh a huna pek chhuah theih loh hi a ni ṭhin a, thil thleng ngai lo pawh a ni lo a, heng zingah hian zirlaite scholarship dawn tur hi chu tel ve lo hram se a ṭha hle. Engpawhnise scholarship hi kan zirlai tam takin kawng hrang hranga innghahna atana an hman a ni a, a hma thei anga sem chhuah ni se a lawmawm hle ang.