CCC-a awmte ei leh in man

Mizoram sorkar chuan Covid Care Centre-a awmte ei leh in man mahnia intum tur thu an chhuah hnuah thuchhuah hran neiin ei an intum tur tihlai hi paih a ni. Hei bakah hian Mizoram State Health Care Society (MSHCS) hnuaia inziak lutte chuan inenkawlna man bakah ei mante an bill leh thei dawn a ni.

Mizoram hi state hausa kan ni lo a, mahnia thawh chhuah sawi tham pawh nei meuh lo kan nih avangin Covid-19 positive heti zat an inenkawl chhunga an ei leh in man peksak vek hi sorkar tan thil harsa tak a ni dawn a, hei vang pawh hi a ni ang, sorkarin CCC-a awmte ei man intum turin a ti hman hial a ni.

Mahni sum dinhmun hre chianga ei man intum tura a ti a nih chuan sorkar hi tawngpawng dem tur a ni hauh lo a, damlo dangte pawhin an ei man leh inenkawlna senso an intum tho avangin Covid-19 avanga damlo an nih avanga engkim mai a thlawna beisei pawh hi thil âwm ber a ni bik lo ang. Hei vang hian damlo zawng zawng hrut rual vek lo hian, mahni ei man tum inhuamte chuan an ei man hi pe ta se sorkar an chhawk zangkhai a nih bakah ei man pe ve thei lo turte thui tak an tum kep a ni tel thei bawk ang.

Sorkar ruahmanna siam tho MSHCS-a inziak lutte tana ei man leh inenkawlna senso bill lêt theihte pawh hi thil lawmawm tak a ni a, hripui avanga hnathawk thei lo leh harsa em em chhungkaw tan a hlu hle ang. Hetihlai hian a huna inziak lut ve hman lote leh inziah luh nachang hre lo, hripuiin a man ve tho chhungkuate tan inziah luhna kawng hawnsak leh thei bawk se a lawm­awm ngawt ang.

Mizoram sorkar hian Covid-19 vei enkawlte ei man leh inenkawlna senso peksak hi a ba bik lo a, pek tur a nei lo palh a nih pawhin sorkar sum din­hmunin a zir loh vang a nih chuan mipuiin kan dem a rem bik lo ang a; nimahsela he sorkar tho hian thil danga hman tur sum a nei leh thei si a nih chuan sorkar lakah an thikthu a chhe ve thung dawn a ni.