Hnathawktute an hah tawh

Health Minister chuan tun hnai khan mipuite hnenah ngenna leh thuchah a tichhuak a, chutah chuan Mizoram dinhmun hrang hrangte leh sorkar hmalaknate a tarlang. Sorkarin Covid-19 avanga damlo enkawlna a siam belh mek thute a sawi a, task force duty, police duty leh executive duty-te an hah tawh thu a sawi a, ambulance driver-te pawh an indaih loin an hah tawh hle tih a sawi lang.

Kum khat chuang zet Covid-19 hripui avangin Mizoram pawh a buai ta a, damlo enkawlna a hnathawktute, dan leh thupek kengkawhtu lamte leh tlawmngaia hlawh nei loa thawktu task force lamte an rim rei ta hle. Mi naran tana thawh theih loh hna an thawh avang hian inchhawk zangkhai hleitheih pawh a ni chiah lo.

Mipuiin thawktute kan ṭawiawm theih dan ṭha ber chu sorkar thuchhuah ṭha taka zawm hi a ni ber a, chumi tur chuan rilru kan siam thar leh a ṭha khawp mai. Covid-19 kan hmelhriat tirha kan hlauh dan, kan fimkhur dan leh sorkar leh khawtlang hruaitute thu kan awihzia kha hre chhuak thar ila, tuna hripuiin nasa taka min tihbuai tak hnuah hian a hma aiin i fimkhur thar leh ang u.

Sorkar lamin theihtawp an chhuah a, tihfuh loh leh tihsual palhte pawh a awm ang a; chuti chung chuan sorkar hmalaknate hi fakawm leh lawmna tur a ṭhahnem hle a, thawktute inpekna leh hlawh nei loa inpete inpekna a zahawm a, thawktute kan ṭawiawm theih dan ṭha chu sorkar thuawih a ni tih i zir thar leh ang u.