Hri do kawnga khawtlang inpekna

Aizawl Municipal Corpo­ration huam chhunga Covid Care Facility Management Committee chu tun hnai khan an ṭhukhawm a, Community Covid Care Centre dinhmunte an thlirho. Indian Medical Association aṭangin team 43 insiamin doctor 300 velin CCCC-a in quarantine te an vil a, medical monitoring leh thurawn te an pe a; CCCC chungchangah harsatna lian tham a awm hrih lo tih report a ni.

Khawvel pumah hripui a leng mek a, sorkar hrang hrangin an huam chhung ṭheuhah hripui do hna an thawk a, state dang leh ram dang pawhin an thik tham tur khawpin Mizoramah chuan khawtlang hruaitute'n sorkar hi an pui ṭha takzet a ni. Covid-19 dotu tur bik task force din a niin anni hian an veng/ khaw huam chhungah hlawh nei miah loin mahni inpein hna an thawk a. An hnathawh tam tak hi chu hlawh nei pawha mi tam takin an thawh hreh tur thil a ni chungin Mizo tlawmngaiha an lantir a ni.

Hripui a lo luh lohna turin state ramri an veng a, mahni huam chhung ṭheuh uluk taka an ven bakah lockdown avanga chhuanchham awm thei turte thlengin an vil.

Hripui chu dan rual lohin a lo lut ta a, hripui kai leh a kaihhnawih chhui hna (cotact tracing) rim takin an thawk a, hripui avanga khung hran ngaite khungna tur quarantine centre an buatsaih a, chumi hnuah positive-te enkawlna tur CCCC thlengin khawtlang ṭang rualin an din ta hial a ni.

A pawisa zawng pawhin chhut ila khawtlang ṭang rual inpekna hmanga an thawh man hi a ṭhahnem takzet tawh a, an tha sen leh an ṭangkai dan zawng zawng chhut phei chuan khawvel pawhin a entawntlak tur khawpin khawtlang ṭang rual hi he hripui dona kawngah hian an thawh hlawk a ni.

Sorkar siam hripui vei enkawlna CCC-te a khat zo tawh a, khawtlangin CCCC siamin veng chhunga doctor leh nurse-te'n tlawmngaiin an vil bawk a, hei hi Mizo tlawmngaihna a taka hmu theiha rawn par chhuak a ni e.