Hripui len laia zirna leh school fee

Tun hnai khan School Education Minister hoin hripui len chhunga zirna kalpui zel dan tur chungchang sawiho a ni a; he hun ah hian sikul kal theih loh chhunga private school-ten fees an lak dan chungchang sawiho a ni. Mizoram Independent School Association hruaitute chuan sikul ṭhenkhatin harsatna nasa tak an tawh thu an sawi a, uluk taka sawiho a nih hnuah school fees an lak mek aṭanga 70% aia sang lak loh nise an ti a, a hniam thei anga fees kalpui turin school neitute hi ngen an ni.

Hripuiin a nghawng nat ber zinga mi chu zirna a ni a, zirlai tam takin kum an hloh phah dawn a, pawl sawn thei zingah pawh an thiam tur ang thiam kim lo a awm theih ang. Kum khat chuang zet sikul kal a mumal tawh loh avangin zirlai zingah mahni kum zata an thiam tur thiam phak lo, zirna kawnga hnufum deuhte thlengin a awm phah thei hial ang.

Zirna sikul khar a nih chhung hian sikul tam tak chuan online class an kalpui a, hei hi zirlaite tan pawh a ṭangkai hle a; nimahsela sikul ṭhenkhat leh zirlai ṭhenkhat tan hei hi thil theih loh a ni. Online-a class kalna tur hmanrua nei lo a awm theih a, internet connection pawh a chak tawk lohna khua a awm ang a, online class hmanga inhrut rual hi chu thil harsa tak a nih hmel.

Hetihlai hian private sikul ṭhenkhat chuan class pangngai angin online class hmangin zirtirna an kalpui reng a, sikul building luah man leh zirtirtu hlawhah an senso a ngai reng tiin school fee-te pawh a ngai angin an la leh tawh a, hei hi School Education Minister ho inrawnkhawm chuan 70% aia tam lo lak turin rawtna an siam ta a ni.

Hripui avang hian insiamrem ngai leh inngaihdam tawn a ṭulna hi thil tam tak a awm a, chumi zinga pawimawh tak pakhat chu chhungkaw tam tak khawsak phung nghawngtu zirna kalpui man (School fees) hi a ni ang a, rawtna mumal tak siama fel taka kal dan tur rel mai hi a ṭul hle a ni.