Kan thihpui hi kan do a ngai

Excise & Narcotics Depart­ment (END) chhinchhiah danin kum 2021 chhungin Mizoramah ruihhlo vangin mi 23 an thi tawh a, hei hi April 21 thleng kha a ni. Kum 2020 chhungin ruihhlo vangin mi 67-in nunna an chân a, tun hnai kum 12 chhunga kum khata ruihhlo vanga thi an tam ber kum a ni.

Mizorama kan hmelma lian ber pakhat chu ruihhlo hi a ni kan ti ṭhin a, ruihhlo do kawng­ah sorkar leh khaw­tlang pawh an ṭangrual ṭha ṭhin hle. Heti chung hian Mizoramah ruihhlo chi hrang hrang a hluar a, phalna neia zu zawrh a nihlai pawhin ruihhlo hi a rêm duak chuang lo a, zu zawrh tihtawp hnu lawkah ruihhlo vanga thi an pung leh tih erawh END chhinchhiahnaah a lang.

Engpawhnise sorkar leh khawtlangin kan duh loha kan do rawn tia kan sawi kan sawi ruihhlo hi kan ramah a hluar hle tih chu kan ṭhalaite'n an thihpui nasat dan aṭang hian hmuh hmaih rual a ni lo a, January-April-ah mi 23 an thih chuan thla khatah mi paruk dawnin an thihpui ziah ang a ni a, a pawi hle a ni.

Ruihhlo avanga thihna thleng hi kan ngai thutak (serious) tawk tawh lo emaw tih mai tur a ni a, thil thleng pangngai ang maiin kan en liam ta a ang hial a, a zialo hle. Covid-18 hripuiin min nuai a, hun rei tak chhung chu thihpui pawh awm mang loin kan inenkawl dam zel thei a, chuti chung chuan kan hlauin theihtawp chhuahin hripui kan do tlang a ni. Khatihlai khan ruihhlo vangin kan ṭhalaite an thi zel mai a lo ni a, lock­down avanga kan inkharkhip nasat ber kum kha ruihhlo vanga thi an tam kum a ni leh tlat maite hian ngaihtuah a tithui hle a ni.

Ruihhlo hi a thu mai ni loin a taka do a ngai a, tlawm­ngai pawlte inpekna ringawt chuan tlin loh leh thlen phak loh chin a nei thei a; heti khawpa kan thihpui tam avang hian na zawka do a ngai a, he mi kawngah hian sorkar hi a ṭan thar a ngai takzet a ni.