Sumdawngte harsatna

Mizoram Business Coordina­tion Committee (MBCC) chuan hri leng avanga inkharkhip kalpui mek an tawrhnate hriatpuia ruahmanna siam sak turin sorkar an ngen a, Chief Secretary hnenah tun hnai khan lehkha an thehlut a; he pawl hi sumdawng pawl hrang hrang 69 inzawm khawm an ni.

Covid-19 hi kan tuar tlang a, a tuar na ber zinga mi chu sumdawngte hi an ni ngei ang. Sumdawnna ṭhenkhat chuan a tlakchhiatpui a, dawr leh kudam luah man a thlawna an chawi a ngai a, hnathawktute hlawh an pek reng a ngai a, loan laa bul ṭante an awm avangin an sumdawnnain a tuar na hle. Chutihlaiin sudawnna ṭhenkhat chuan he hri leng hi an hlawkpui zawk ve hial thei a, mipui an thil zawrh azirin a hlawkpui leh a tuar pawl a awm theih awm e.

Sorkar tan pawh sumdawngte harsatna hi ngaihthah ngawt theiha ni lo chungin hmalakpui dan a vang viau mai thei a, inkharkhipna kalpui a nih chhung chuan dawr hawn hi a rem lohna tam taka awm thei ang. Chuti chung chuan sorkarin ngun takin thil zir chiang se, inbuatsaihna leh inchinfelna hun nei loa kharkhip hnan dawr eng emaw zat a awm ngei dawn a, chumite tana mipui ko khawm lo zawnga an inchinfel theihna hun siamsak pawh a ṭha hle ang.

Shopping mall-te pawh hun rei tak khar a ni ta a, a chhungah bungraw chhe thei leh hmuar thei tam tak a awm ang a, siam rema chinfel ngai eng emaw zat a awm dawn a, chu'ng mite hnathawhna hun siamsak thlengin sorkar hian ngaihtuahpui thiam se a ṭha hle ang.

Sumdawngte hian inkharkhip chhung hi an tuar na hle tih a chiang a, rawtna te hi mipui vantlang tana him lo a nih hran loh chuan ngaih pawimawhsak an ṭha khawp ang.