Chief Minister thuchah leh Mizoram

Mizoram Chief Minister chuan tun hnai khan Mizoram mipuite hnenah thuchah a tichhuak a, lawmthu a sawi bakah hripui laka fimkhur turin mipuite a chah a, hripui do tura sorkar hmalaknate a sawi bakah Mizoram sum dinhmunte a sawi chhuak bawk.

Covid-19 avangin India ramin sum leh paiah harsatna a tawh thu a sawi a, chhiah a luh tlem avangin Mizoram sum dinhmun ṭha lo ta pawh hi, sorkar laipui thiam loh pawh a ni lo a, state thaim loh pawh ni loin, hripui avangin kan pawisa lakluh theih a tlem ta vek a ni, a ti a, 2020-21 budget-ah cheng vaibelchhe 1,500 vel kan hmuh tur ang kan hmuh phak loh thu a sawi. Chief Minister sawi danin nikuma kan sum dawn lohte leh kumina loh theih loha hman ṭulnate avangin sumah kan harsa hle a, 'development tur hi chu sum chu tih ngaihna a awm lo,' a ti hial a; chutihlaiin central aṭanga sum lo kal an rawn pek chhanah chiah bak chuan thil dangah hman theih loh a awm bawk thu a sawi.

Kan state dinhmun en hian sum leh paiah harsatna nasa tak kan tawk chho mek tih a lang ta a, sorkarin a hnathawkte hlawh a dil aṭang khan chu chu a lang chiang a ni. Hun rei tak chhung chu kan state sum dinhmun dik tak sawifiahna tak hi thuneitu lam aṭangin a awm meuh lo a, tunah Chief Minister ber leh Finance Minister-in a rawn sawi hi a lawmawm a, hei aia chiang zawk hian a nihna tak a figure-te nen kimchanga tihchhuah theih ni se a lawmawm lehzual ang.

Engpawhnise tunah chuan kan state dinhmun tlangpui chu kan hre ta a, state sum aṭanga hmasawnna hna pawh thawh hleitheih loh dinhmunah hian kan lo ding ta hi a vanduaithlak a, Covid-19 hri leng piah lama vanduaina dang vawk pul hri, khaw khêng, kangmei chhuak leh raltlan buaipui ngaite thlenga a awm avang hian sorkar pawh a lu a hai ve hle ang tih a rin theih.

Hei vang hian sorkar tan mamawh tihtlem a, ṭul loa sum hmanna awm theite zawn chhuaha tihtawp hi tihmakmawh a ni a, midangin sorkar ṭanpuina an pek luh mek lai hian thil dangah sorkar sum hi ren lem loa hmang pawl an lo awm ang tih a hlauhawm a, sorkar pawh venpui a ngai hle a ni.

Kan state hotupa berin, "Ka thu tawp ber atan chuan Pathian ṭanpuina chauh lo chuan he hri do hi tih theih a ni lo," a tih hi kan zavaiin vawng tlat ila, Pathian puihna dil chung zelin kan zavaiin i ṭang tlang ang u.