Pawi tham loa kan ngaih pawi si

Sorkar mi pawimawhte leh Aizawl City Local Council Association hruaitute'n May thla chhunga Covid-19 dinhmun an thlirnaah chhungkuaa inkaichhawng an tam hle tih hmuh chhuah a ni. Chhungte hnen aṭanga kai chhungkaw 725 an awm a, lainate tlawhna aṭanga kai mi 121 awmin ṭhenawm hnaite aṭanga kai 195 an awm a, ṭhiante nena intlawh vanga kai 81 leh hna­thawhna aṭanga kai mi 122 an awm.

Covid-19 hri hi amahin a vak darh lo a, mihringin kan put darh a nih avangin mahni ina awm turin thuneitute'n thurawn min pe reng a, mi tam berin kan zawm laiin a zawm lo mi engemawzat an awm. Mahni ina tawm loa vak chhuakte hian Covid-19 an kai vek kher lo a, a vanduai mi engemawzatin an kai tih finfiah a ni tawh a; hetihlai hian Covid-19 kai nazawng hi dan bawhchhiat vanga kai an ni bik lo a, loh theih loha hna ṭulna avanga chhuakte leh mi vanduaite an awm ve bawk ang.

Engpawhnise he hripui hi tuin nge pu darh tih a hriat theih loh avang tak hian mahni ina tawm tur leh, mahni chhungte leh ṭhian te, ṭhenawm hnaite pawh intlawhpawh lo tura zirtir kan ni a, chu chu mi ṭhenkhatin an zawm lo. Kan hmelhriatte an nih chuan hripui pawh min kai thei lo tura rinna kan nei lian hle a, hei hian thil pawi a thlen thei tih a takin kan hmu chho mek a ni.

Covid-19 dona kawngah hian kum khat dawn lai ṭha takin sorkar thu zawmin kan awm thei a, tun hnaiah hian ṭul bik thilah pawh ni lem loa dan bawhchhiaa vak chhuak hmuh tur an awm ta fo mai hi a pawi hle. Heng mite hian mahni chhungte tlawh te, ṭhian hnaite nena inkawm leh ṭhenawm hnaite bula awm chuan Covid-19 hi inkaichhawng theih lohah an ngai a ni palh thei a, kan dinhmun en hi chuan kan hnaivaite aṭanga kai kan tam ta hle a ni.

Pawi tham lo nia kan ngaih, kan pal liam mai mai avanga Covid-19 hri kai kan pung zel a, he hripui do tur hian ṭan rual a ngai a, dan zawm a pawimawh hle tih i zir chhuak ang u.