Vawk vulhtute manganna

Vawk pul hri African Swine Fever (ASF) avangin Mizoramah march 21, 2021 hnuah vawk 4,832 an thi tawh a, hmun 99 chu hri lenna hmunah (ASF infected area) puan a ni tawh.

Tunlai hi vawk vulhtute tan hun thim chhah tak a ni mek a, chhungkaw innghahna leh eizawnna a tawp a, mi tam tak chu ṭapin an rûm mek a ni. Heng mite harsatna belhchhah tur hian Covid-19 hripui a leng bawk nen, sorkar tan pawh ṭanpui leh chhawmdawl a harsa hrih a ni ngei ang, chhawmdawlna lam sawi rik a la ni lo.

Vawk vulhtu vanduai bikte tan chuan an hmalam hun thlir thiam a harsa hle tawh dawn a, eizawnna an thlak a ngai dawn a ni mai lo a, engtin nge ei an zawn chhunzawm dawn, tih pawh hriatthiam a har ang. Tunah chuan vawk pul hriin a tihbuai ve kher lohte pawh Covid-19 avanga eizawnna kawnga mangang an awm mek bawk si nen, ṭanpuitu leh kawng kawhhmuhtu an mamawh takzet a ni.

Tun hun harsaah hian sorkar tan chet lak a harsa kan tih rualin tun hi vawk vulhtute tan sorkar a awm tih lantir hun a ni a, manganna leh buaina chhah tak an tawk meklaia ṭanpui theitu sorkar an neih hlauh chuan an tan hei aia thu lawmawm hi a vang hle ang.

Mizoram sorkar hian SEDP-ah sum ṭhahnem tak a la dah reng tih kan hre tlang a, hengte hi mamawh dan azira pawh theih a ni tih pawh an sum hman tawh danah a lang. Hei vang hian vawk vulhtu mangangte tan sorkar hian a hranpaa ṭanpuina a ruahman thei lo palh a nih pawhin SEDP tal hi hmang ṭangkai se a duhawm hle. SEDP kal tlanga zangnadawmna an dawng thei a nih ngat chuan vawk vulhtu mangangte hian sorkar hi an theihnghilh tawh ngai dawn lo a, ṭanpuina leh chhawmdawlna an dawng loa nakinah SEDP hi thil dangah an hmang tih an hmu leh si a nih pawhin sorkar chet dan an theihngilh tawh lo bawk awm e.