Lunglei-a laboratory din tum hi

Health & Family Welfare department chuan June 1, 2021 khan thuchhuah siamin Lungleiah RT-PCR laboratory bun tura hma an lak thu a hnuaia tarlan ang hian an sawi a. RT-PCR khawl dahna tur hmun him ṭangkai taka hman theihna turin Civil Hospital compound chhungah ‘Laboratory Block' siam tumin hma a la mek a; NEC lamah cheng vaibelchhe 7.8 man hu Detailed Project Report (DPR) pawh siamin a thehlut tawh a, sanction hmuh thuai beisei a nih thu an sawi.

Nikum June 15-a sorkar thuchhuahah chuan, "Aizawl aṭang­in mithiam rual (expert team) ten Lunglei rawn tlawhin Lunglei Civil Hospital-a RT-PCR Diagnostic Labo­ratory bun tura sawr­karin a ruahman mek chu inspection neiin hmalak ṭul te an enfiah," tiin a inziak. He thuchhuah vek hian, "Laboratory a nih dan tura puahchah chhung chuan hun a duh deuh tur thu sawiin khawl man leh a behbawm lei nan cheng nuai 100 chu a lo berah a ṭul dawn thu an sawi," tih a chuang bawk.

Lungleia-a laboratory siam tum hian sawi a hlawh hle mai a, kum khat dawn a liam hnuah pawh RT-PCR khawl a awm chungin a endikna hmun sorkarin a la buatsaih thei lo. Nikuma mithiamte'n an va endika laboraroty atana senso cheng nuai 100 bawr an sawi rik laia NEC-a cheng vaibelchhe 7.8 hu project siam a ni hian laboratory ṭha leh changtlung tak mai siam tumna a kawk thei a, chutih rualin pawisa dil tam lutuk hi hmuh loh phahna a nih palh a hlauhawm hle.

ICMR website lama tarlan danin Mizoram hi India ram state zinga RT-PCR khawla Covid-19 hrik endik theihna laboratory nei tlem ber kan ni mek a, pakhat chiah kan nei. State leh union terriroty tinin RT-PCR laboratory hi an nei vek a, pakhat chiah nei hi chu tlem te chauh an ni. Nagaland-te pawhin laboratory pathum an nei a, kan ṭhenawma Manipur hian hetiang labo­ratory hi panga an nei a, Meghalaya-in pathum an nei a, Assam phei chuan private-a an neihte nen laboratory 18 lai a awm a ni.

Lungleia laboratory din hi Mizoram sorkar hian politics thila innawrna angah ngai lo se, Mizoram chhim lamin an chhawr ṭangkai tur a ni tih hriain theih­tawpin ṭan la se; nikuma endiktu mithiamte khan cheng nuai 100 bawr vela din theih niin an report a, Mizoram sorkar hian a duh phawt chuan SEDP aṭang pawhin laboratory hi a siam thei ngei ang.