Rawmi leh Mizoram economy

Horticulture department-in rawmi ṭiak supply-tu tur a zawnna tender chu endik a ni ta a, Mizoram Bam­boo Producer (Secondary Hardening Unit, Growmore Biotech), IMCS Nursery Firm leh Bairabi Bamboo Producer-te chhanna chu pawm an ni a, anni hian Rs 85 ṭheuhin an chhang a ni.

Firm hrang hrang nia langten a ruala rawmi supply tur an lo nei rual ṭhup thei mai hi thil mak angreng tak a ni a; kum dangah rawmi hi an hralh chhuah leh zawrh thawm hriat tur a awm ngai meuh lo a, kuminah sorkarin tender a koh hma daih hian an lo ching/ kui ṭan tawh dawn tihna a ni a, an rawmi kui ṭiah hun leh sorkarin tender a chhuah hun a innang fuh chat mai hi anni tan pawh thil lawmawm tak a ni ang.

Firm hrang pathum ni si, rawmi chi an chhanna zat a inang chiah vek mai pawh hi thil danglam tak chu a ni a, an zavai maia Rs 85-a an pe thei hi thil thleng khat tak a nih hmel. A chhangtu zinga pakhat hi chu Growmore Biotech hnuaia mi an ni a, anni hi raw chi Brandisii lo supply tawhtu kha an ni. Growmore Biotech hotupa Dr N. Barathi phei chu kan Chief Minister pawhin vawi tam a hming a lam tawh mithiam kha a ni a, kum 2019 February-ah khan CM Conference Hall-ah kan Chief Minister leh Horticulture department hotulute nen mau ṭha chi tam tham tak phun leh tihpun dan an lo sawiho tawh a ni.

Mithiam takin a enkawl Growmore Biotech-te'n rawmi ṭiak an supply theihna zat chiaha lo chhiar nachang hria firm dang pahnih an awm hi an fingin an tifuh tih loh rual a ni lo. Tun ang huna rawmi kui ṭiah nachang an lo hria hi anmahni leh Horticulture department tan a lawmawm hle ang.

Kan sorkar flagship prog­ramme a ni a, raw/ thing phun hunlai a nih avangin hri leng karah pawh tikhawmuang loa kalpui a ngai a; sorkarin hma a la ta rau rau bawk a, kan state economy chawi sang thei tur khawpin hlawhtling ngei thei se a lawmawm ang.