Hri dona kawngah ram hruaitute

ZPM party chuan thuchhuah siamin hripui dona kawngah sorkar chu joint party meeting emaw, joint legislature party meeting emaw, special session emaw ko turin an nawr ṭhin a, tun thlenga tihpuitlin a la ni lo chu sorkarin eptu party-te thawhpui ṭul a tih loh vang nia a lan thu an sawi.

Mizoram chauh ni lo, India chauh ni lo, khawvel pumin a buaipui Covid-19 hri leng avangin kan buai mek a, hei hian ṭum danga kan la hriat ngai loh harsatna tam tak a thlen. Mizoram sorkar pawhin theih­tawp chhuahin he hri hi a do a, hna dang pawh thawk hman mang loin hri doin a buai a ni deuh ber a; khawtlang ṭang rual leh kohhran thlengin sorkar hi an thlawp ṭha em em a, India ramah chuan hri do kawnga state ṭang rual ṭha ber kan ni hial awm e.

Hri do hi sawihoa chinfel chi a ni kher lo mai thei a, chutih rual chuan a dona kawnga kan ṭanrual lehzual zawk theihna turin sawiho tur chin chu a awm ve bawk ang. Tun hnai khan Health Minister hoin Aizawl Municipal Corporation huam chhunga party hrang hrang aiawh MLA-te leh Councillor-te koh khawm an ni a, hri dona kawnga chet lak dan turte an sawiho. Sorkarin hri dona kawnga ke a pen dawnin sorkar mi leh sate bakah pawl hrang hrang aiawhte a sawm ṭhin a, kohhran aiawhte thlengin koh an ni ṭhin.

Hetihlai hian kan sorkar hian eptu lam MLA-te nen he hri leng chung­chang hi an la sawiho lo niin a lang a, hei mai hi ni loin ruling party lam pawh hi hri do chungchang sawiho tur hian MLA zawng zawng inkohkhawm hi an la nei lo a ni mai thei. Engpawhnise mihring ziaah hian neitu rilru pu tur chuan a relna kawnga in koh tel ve emaw, a mawh­phurtua ṭan ve emaw hian awmzia a nei zawk ṭhin a, a ram pumin hri kan do laia a relna lama eptu MLA-te koh tel an ni ve lo tak tak a nih chuan thil ṭha ber a ni kher lo ang.

Ram hruaitute ṭan tlan hun a ni a, hri dona kalpui zel dan tur relho turin MLA 40 kan neihte hi koh khawm theih ni se a sawt ngeiin a rinawm.