Sorkar thupek i zawm phawt ang

Mizoram sorkar chuan Covid-19 hri leng a ziaawm theih loh avangin lockdown kalpui mek chu a pawt sei a, June 14, 2021 zing thleng inkhuahkhirhna hi kalpui a ni ang.

Kumina lockdown hian ṭum dang aiin sawisel a hlawh a, lockdown avanga eizawnna kalpui thei lote âng thawm hriat tur a tam ta hle. Lockdown avangin mi tam takin eizawnna an chhunzawm thei lo a, sum lakluh nei thei lo eng emawzat an awm bakah eizawnna tlakchhiah phah pawh sawi tur an awm nual ang. Heng mite ân hla pakhat chu, 'Lockdown reltute hi thla bi kima hlawh la an ni a, midangte harsatna an hriatthiampui lo,' tih a ni ber ṭhin.

Hetihlai hian hri vei kan pung zel mai a ni lo a, thihpui pawh an pung zel a; hri vei enkawlna damdawi-in a khat deuh reng a, oxygen hmang leh ventilator-a enkawl ngai pawh nitin an pung zel a ni ta ber mai. He lam zawng aṭanga thlir chuan lockdown hi puan chhunzawm zel awm tak a ni ve bawk.

Sorkar hian lockdown a puang a nih chuan mipuiin a zawm hi kan bat a ni a, kan ngaihdan a ni tawh chiah lo a nih pawhin thu­neitu lamin lock­down ṭula an hriat chhung hi chu thupek kan zawm mai a ngai. Mahni thu thua thil lo kalpui ve ngawt theih a ni lo, mi tam berte himna leh ṭhatna tur ngaih­tuahin sorkar hian thutlukna a siam a, chuvangin sorkar kan thawhpui thiam a ṭul a ni.

Lockdown chung­chang bikah hi chuan a khawi zawng pawhin thutluk­na siam se sawisel a hlawh dawn tho a, sorkarin lockdown kalpui zel tura ro a rel hi mipuiin hrethiamin dawh hram hram ila, mahni in chhuahsan loin hri lakah i inveng chhunzawm zel ang u.