Kan mithiamte dinhmun
June 15, 2020 khan Mizoram sorkar chuan Lunglei Civil Hospital-a RT-PCR khawl dah theih dan tur enfiah turin mithiam pathum a ruat a, anni hian ngun takin thil awm dante an enfiah a, laboratory din tura harsatna awm theite leh laboratory din a theih leh theih loh dante an endik. June, 2021-ah pawh Lungleiah hian laboratory hi din a la ni lo a, Mizoram sokar aiawha thil awm dan sawi fiahtu Hospital & Medical Education director chuan sorkar mi tirh pathumte report chu a rintlak tawk lo deuh, tiin Lungleiah hian laboratory din theih a la ni loh dan a sawi fiah.
Mithiam ni ve lem lo tan chuan a khawi hi nge rin tur hriatthiam a harsa a, sorkarin mithiam tia a tirh hmasak pathumte report hi vantlang hmuha tlangzarh a nih loh avang hian eng ang chiahin nge report an pek pawh hriat a ni lo. Hetihlai hian Lungleia RTPCR khawl dah duhtu lamin zawhna an siam an chhânnaa a lan danin heng sorkar mi tirh pathumte hian laboratory din theih dan chu a awm ngei niin an sawi a; anni pathum hi 'mithiam' an nih leh nih loh chu anmahni lam insawi duh chiah lo mah se an ṭhiante chanchin an ziahnaah chuan mithiam mai pawh ni lo, India leh khawvel huap pawha hetiang lama research beia project hrawl tak tak khawih tawh, a ṭhente phei chu ZMC lama an hman mek laboratory din a nih theihna tura mi ṭangkaite an nih hmel.
Engpawhnise he thila lang chiang ta chu kan mithiam chhuanvawr nia ngaih mi pathum, kum 2020-ah pawh sorkarin a rin em emte (Office Order No.D 33012/41/2020- HFW(ETCL)/90, Dated 14th June 2020 hmanga a tirh) report pek ang hi bawhzui a ni lo a, Lungleiah laboratory din tumna tak tak a awm lo a ang hle. Sorkar lam sawi dana NEC lama project bawhzui mek hi nghah a nih chuan Covid-19 hripui leng avanga kan harsat vanglai tak hi chuan laboratory hi an din hman lo palh ang tih a hlauhawm a, hei hi mipui zah vang tal pawha chinfel thuai a ṭha ngawt mai.
Kum 2020-a Mizoram sorkar ngeiin tlawmngaia laboratory din theih dan enfiah tura a tirh mithiamte hi Mizoram sorkar mi leh sa chiah pawh an ni lem lo a, an pathum hian academician chhuanawm tak tak, laboratory lamah hnate thawka hnuhma ṭha tak tak lo nei tawhte an ni hlawm. Anni report hi rintlak tawk loa kan ngai dawn a nih chuan kan mithiam (academician) lam rintawk lohna hial a hring palh ang tih a hlauhawm a, politics lam dah ṭhain he thil bik tal hi chu a chin chhuaka sawifiah a ṭul khawp mai.