Admission fee tihhniam
School Education Minister chuan sorkar sikul leh sorkarin zirtirtu hlawh leh ṭanpuina a pek sikulah pawl 11 admission fee 30%-a tihhniam a nih tur thu a sawi a, he thu hi Mizo High School tuala an sikul aṭanga HSLC-a tiṭhate an lawmpuina hunah a sawi.
Sorkarin mipuite harsatna hrethiama admission fee a tihniam hi a lawmawm takzet a, tunah hian chhungkaw tam tak chu an fate admission fee chu sawi loh eizawnna tur dapin an buai mek a ni. Tu thiam loh bik mah ni loin hripui a len avangin mipui an rum a, retheite retheihna a zual a, mi hausa leh milian kan tihte zingah pawh sum leh pai leh thil danga harsatna tawk an tam hle a, hetiang kara sorkar lamin admission fee tihhniam a tum hi a lawmawm hle.
Private school lam pawhin hei hi an zawm theih chuan duhthusam a ni ang a, chutihlaiin private school hi an zavaia huang khata khung ngawt theih an ni lo ang. Private school ṭhenkhat chu hlun leh lian tak tak an ni a, naupang pawh ṭhahnem tak nei an ni a, rei tak an thawhrim tawh avanga hlawhtlinga a neitute pawh mihausa tak tak lo ni ta an awm.
Hetihlai hian loan-te nen ṭang kawpa sikul din thar tir, sikul building luah man pek ngai leh zirtirtu hlawh pek ngai bawk avanga buai ve tak sikul neitu an awm bawk ang. Hei vang hian an zavaia admission fee tihniam tura nawr hi a harsa deuh mai thei a, chutihlaiin sikul ṭhenkhat hi chuan miretheite harsatna hriaa admission fee hi an tihhniam theih chuan tun hi luan chhuahna remchang a ni a, sikul dangte zah vang leh mitmei ven vanga admission fee an tihniam lo a nih erawh chuan mirethei leh harsate aiin sikul neitu dangte an dah pawimawh zawk a nihna chen a awm thei ang.
Minister-in admission fee tihhniam a nih tur thu a puanna hi sikul pakhatin function an neihna hmunah a ni erawh thil mak tak a ni. Mitthi vui tur pawha kan chhuah theih loh lai, lockdown avanga engkim inkharkhip a nihlai leh eizawnna pawh chhunzawm thei loa mi tam tak an rûm mek laia sorkar sikula HSLC result-a tiṭhate lawmpuina an buatsaih mai hi chu chin chhunzawm lohah a ṭha hle ang.