Raltlante leh Covid-19

YMA Sub-Head­quarters, Champhai chuan Myanmar aṭanga Mizorama rawn lut raltlan zinga an khaw lama lêt leh duh an awm a nih chuan June 10 hmaa lêt turin an hriattir a; an paltlang khuate tana a him zawkna turin mahni duh huna veivah phal a nih loh bakah an hawna kawng zawh bîk turte an siamsak.

Myanmar lama kan unaute an duh thu reng pawh ni lo, politics avanga buaina chhuak avangin an sahimna zawngin Mizoramah mi eng emaw zat an rawn chhuk a, khaw tam takah an chenna turte siamsak an nih bakah ṭhenkhatin an chhungkhat laina hnaite an bel bawk. YMA leh khawtlangin ṭha taka lo dawngsawngin an buaipui a, sorkar pawhin a remchan angin an ngaihsak bawk a ni.

Vanduaithlak takin raltlante lo luh hun hi Covid-19 hripui len vanglai tak a ni hlauh mai a hei hian an harsatna hi nasa takin a belhchhah a, a dawngsawngtute tan pawh a buaithlak phah reng a ni. Mizoram an rawn luh hnuah raltlan zingah Covid-19 positive eng emaw zat hmuh chhuah an ni ve a, a vanduai zual phei chu an raltlanna hmunah Covid-19 avangin an boral hial a, an lainatawm hle a ni.

Hetiang boruak-ah hian raltlante veivahna leh chet vêl dan turah YMA lamin ruahmanna an siam a, hei hi ṭha taka zawm vek theih ni se a ṭha khawp mai. Heng ruahmanna awmte hi a raltlante beng a thleng lo palh a nih pawhin anmahni enkawltu leh tuam hlawmtu lamin lo bengvarin hrilh hria se, Covid-19 avanga inkaihhruaina awm mek leh raltlante chet vêl dan tura kaihhruaina hi ram chhung mipuiten zawm vek ni se a lawmawm hle ang.