Kuthnathawktute mamawh tui lakna ṭha

Irrigation & Water Resources (IWR) department chuan tun hnaiah Mizoram hmun 240-ah 'ground water irrigation project' kalpuiin tui an verh a, chhungkaw 502 huan/leilet a chawm thei dawn a ni a; he project hi PMKSY leh NABARD aṭanga kal a ni.

Mizoramah hian loneitu tam berte chuan tlang­ram lo neih (jhum cultivation) hmangin ei an la zawng mek a, kum tin mai an lo neihna hmun an sawn a ngai a, hun leh tha a heh em em a ni. Tlangram lo neih thlakna tur hi kan state sorkar hian a zawng ṭhin a, tun thleng hian a la hmu fuh hleithei lo a, hei vang hian loneitute dinhmun pawh a beh ngaiin a bet reng a, a nawlpui hmasawnna hmuh tur a awm meuh lo a ni ber mai.

Hetihlai hian loneitu zingah thlai leh thei chin tur thlang fuh thiam deuh te, hmunhma nei ṭha leh tui hmu ṭhate chuan an din chhuahpui ṭan der tawh a, a vannei leh a fing deuhte chuan an hausakpui ve ṭan ta. Heng mite hian a hralh kal tur thlai/ thei chin nachang an hria a, chumi piah lamah a châwm leh enkawl dan an zir peih a, chu mi kawnga pawimawh tak chu tui hnianghnar neih hi a ni.

Tlang chhipa lo nei ṭhin kan nih avang hian fur lai a nih loh chuan loneitu tam zawk hi chuan thlai an thar thei lo a ni deuh ber a, tui pek tur a remchan loh vang a ni a; hetihlai hian tui ṭhatna hmuna leilet leh nûl nei ṭha deuhte chuan thlasik thlai chingin an hausakpui ṭan mek. Kan ramah hian tui hnianghnar ṭha chu nei ngat ila kuthnathawktute tan kawl a eng dawn a, chumi kawngah chuan IWR-te hmalakna hi a ṭangkai thei dawn hle a ni.