Assembly Special Session

ZPM leader Lalduhoma chuan Covid-19 donaa sum harsatna chingfela ruahmanna fel tak siam turin Assembly special session koh a ṭul thu a sawi a; session-a pharh ni si loa sum hman vek tawh hnua supplementary demand hmanga inhrut leh ṭhin thlakhlelhna chu kalsan a hun tawh thu a sawi.

Duhoma sawi danin kum 2020-21 budget siam laiin hripui dona hi telh a la ni lo a, hripui a len tak avangin budget-a sum dah ang ni loin nasa takin hman a ni a, kum tawpah supplementary demand hmangin pawisa hman hnu chu pawm leh hnuhnawh a ni. Kum 2021-22 budget siam a nih dawn erawh chuan hripuiin nasa takin min tibuai tawh a, sum hmanna tur pawh a tam hle tih a hriat lâwk tawh a; nimahsela chuti chung chuan Health department budget chu a hma aiin a tlem zawk a, hetihlai hian sorkarin restricted tender hmangin hna tam tak an inpe reng a ni.

Sorkar sum reng reng hi Assembly House-ah MLA rualin an sawi khawm hnuah hman theiha pass ṭhin a ni a, chumi ang diak diak chuan kal theih ni lo mah se he budget hi inkaihhruaina leh a kawng hmang hruaitu ber a ni ṭhin. Tuna a kal danah hi chuan budget-ah hripui dona tur mumal taka dah ni si loin pawisa pawh khawm a ni a, budget-a sum awm tawhna dangte khawih chet theih loh ang thawthangin dah ṭhat a ni a, chutihlaiin sorkarin a hnathawkte hlawh a dil a, mipui aṭangin relief fund thawh turin kut a dawh reng bawk a ang ber.

Sorkar hian Assembly special session hi a duh chuan a ko thei reng a, chutihlaiin ṭul a ti lo a nih chuan a ko lo thei bawk. Eptu lam thlirna leh sorkar thlir dan hi a inang lo fo a, special session koh ṭul tih lohna tak an nei a nih chuan session-a sawiho kher loh hian hripui dona hi kalpui zel theih a nih dan a awm tho ang a; chutih rualin sawihoa ṭha taka tih theih ni reng si sawiho kher loha kalpui zel duh zawkna a awm hrim hrim a nih erawh chuan thil hrisel ber a ni lo ang.