Lockdown, mirethei leh CMRF

Mizoram sorkar chuan June 14-a tawp tur total lockdown a kalpui mek chu kar khat dang a pawt sei leh a, June 21 thleng a awh ang. Total lockdown kalpui dan tur kimchang hi State Disaster Management Authority (SDMA) hnuaia State Executive Committee (SEC) chuan a rel tawh a ni.

Mizoram hi Covid-19 thawh hnihna a thlen hnua India rama inkhar­khip kalpui hmasa ber zinga mi a ni a, 'inkhuahkhirhna' tiin April 20, 2021 aṭangin kalpui ṭan a ni. Hemi hnu hian 'lockdown' tih leh 'total lockdown' tiin a hming hi thlak a ni a, a kalphung erawh a danglam tam lo.

He inkharkhip hun chhung hian hripui leng hi a ziaawm hleithei lo a, ni khata hripui vei 200 chuang hmuh chhuah a la ni deuh reng a, tun hnaiah pawh ni khata positive 300 chuang hmuh chhuah nite pawh a la awm. Hei vang hian total lockdown hi a hlawhtling lo tia puh ngawt theih a ni lo; chutih rualin rei tak kan inkharkhip tawh hnua hripui leng dinhmun a ziaawm chak lo lutuk erawh a pawi hle.

Total lockdown tuar bertu nia ngaih chu khawpuia mirethei (urban poor) an ni a, sum lakluh nei miah loa thla hnih dawn awm hian chhungkaw tam tak a nghawng na tawh hle. Ei leh in tur ngawr ngawr hi chu khawtlang zarah pawh nghei loa kal dan a awm thei mai a; nimahsela an nitin khawsaknaa mamawh sum senna tur hrang hrang an thawh chhuah theih loh avangin an buai ta hle.

Sorkar tan mi harsa zawng zawng ṭanpui sen a ni hauh lo a; nimahsela 'relief fund' a nih angin mipui thawh khawm Chief Mi­nister's Relief Fund aṭang hian tun aia ṭhahnem zawk hi miretheite ṭanpuina atan hman chhuah ni thei se, a sum awm sa zawng pawh hi ṭanpui ngai an awm miau avangin hman chhuah ni mai se a âwm lo hauh lo ang.

Khawpuia miretheite khaw­sak harsat tawhzia hmuh hian sorkar infrastructure atana CMRF hman ṭhen a ni kha a uiawm zual a, ṭanpui ngai ṭanpui sen loh an awm chhung hi chu CMRF hi Covid-19 kaihhnawiha mi harsate ṭanpuina atan bik hman ni tawh se, thil dangah hman ni tawh lo se a duhawm hle a ni.