Total Lockdown chhunga Zero Tolerence Week

Mizoram sorkar chuan total lockdown a kalpui mek chu kar khat chhung a pawt sei a, June 21 zing dar 4 thleng a awh ang. Hetihlai hian Aizawl DC chuan Aizawl Municipal Corporation area chhungah Zero Tolerence Week kalpui a nih thu a puang ve bawk.

Covid-19 thawh hnihna a lo thlen hnuah Mizoram hi inkharkhip hmasa ber pawl kan ni chungin hripui leng­in ziaawm lam a pan hleithei lo. Kan inkharkhip ṭantirh aṭanga ni 50 a liam hnuah pawh mi tam tak eizawnnain a tawrh khawpa inkharkhip a la ṭul zui zel a ni.

Hetihlai hian kan inkharkhip tirh aṭanga khawng taka thil kan kalpui loh rah hi a chhe zawngin kan seng mek tia puh a awl ta hle. A tirah khan sorkarin khauh takin thil lo kalpui se kan ziaawm deuh ang em, tih zawhna a awm thei. Chumi tichiangtu chu Total Lockdown puang reng chunga 'Zero Tolerance Week' siam hi a ni.

A hma khan dan bawh­chhiate inhrethiam chungin kan inkhar­khip a, mi ṭhenkhat eizawnna tihtawpsak siin pawna chhuak thei, veivak leh inlen pawh an tam hle bawk a, hremna pawh a khauh tawk lo a nih hmel.

Ni 50 kal taa kan inkharkhip tirh khan mi tam tak eizawnna kan tibuai ta sa sa, kan hotute khan 'zero tolerance' nen Covid-19 kha lo do se tun aiin kan ziaawm deuh theiin a rinawm a; chutih rualin tuna zero tolerence tih hi kalpui loh ai chuan a la ṭha zawk tho a, sorkar hian dan hi a zam a nih chuan a kenkawh lamah ṭan a lak hi a pawimawh hle reng a ni.