Thilpek dawngtu lam thuchah

Covid-19 hripui donaa Health & Family Welfare department-in ṭanpuina hmanraw hrang hrang a dawn chungchangah HFW Secretary chuan thuchhuah siamin, "Ṭanpuina thilpek hlu takte hi mumal taka record vawn leh sem zâi a nih theih nan a remchan phawt chuan, thilpek petute’n HFW Secretary leh Principal Director-te hriattir zel tur a ni a, thilpek dawngtu tur office-te’n a petu turte lo bengvàr zel tur a ni," a ti a; "Thilpek dawngtu medical college/ hospital hotute'n thilpek dawn chungchang hi a hma thei angin HFW Secretary leh Principal Director-te hnenah report vat tur a ni a. Motor/ ambulance phei chu a dawng tur leh register tura GAD-ah phalna lâk a ngaih avangin document kimchang nen rang taka report thehluh zel tur a ni," a ti bawk.

Hripui a len vangin Mizo mipuite'n sorkarah ṭanpuina sum leh pai leh thilpek hlu tak tak an pe khawm nasa a, mipui leh sorkar ṭang rualin hri leng doin thawhhona pawh a ṭha hle a ni. Hetihlai hian Health department hnena thilpek pek chunghangah sawi neuh neuh a tam a, tun hnaia Health department thuchhuah siam hian ngaihtuah a tithui hle.

Miin ṭanpuina a pek duh phawt chuan sorkar lam hi chuan lawm taka lo dawn­sawn hi a tih tur ni maiin a lang a, thilpek pek dan tura kaih­hruaina anga ngaih theih thuchhuah siam hi thil inhmeh lo tak a ni thei. Heng thil hi chu sorkar department chhunga inhrilh hriata a chhunga chinfel theih mai nia a lan rual hian, hetia thuchhuah an siam hluai danah hian thil dang kawhtir an tum anga puh theih a ni.

Miin thilpek an pek ngai khawpin kan sorkar a pachhia a, a dawngtu lam nih chuan miin thilpek min pek dan turah thu lo nei vak lo ila a mawi zawk; min pek apiang ṭha taka lo dawnsawna a kalpui zel dan tur erawh department chhunga rel zui leh mai hi thil kalhmang tur a nih zawk hmel.

Chuti ni loa mi thilpek pek dan tur te, a lo dawnsawn dan tura kaihhruaina lo siamte leh ambulance pek lo dawnsawn hnua registration tih dan tur thlenga thuchhuah siam hian thil kawh dang a neihtir a ang lek lek mai.