Mizoram - Assam ramri leh sorkar
Central YMA hruaitute chuan tun hnai kham Chief Minister an hmu a, thil pawimawh an sawiho zingah Mizoram leh Assam ramri chungchang a tel. CYMA thuchhuah tarlan danin, "Mizoram - Assam ramri buai chungchang CM sawipui a ni a, hmalakna awm mekte ngaihthlak a ni," tih a ni.
Tun hnai vek khan Synod thurel anga ram hruaitute hnena thu thlen tura thutlukna lo siam tawh bawhzuiin Synod puipate chuan CM hi an hmu a, 'ṭhenawm state nena ramri buai chinfel thuai a nih theih nana hmalak' chungchangte an sawiho.
Mizoram leh Assam ramri hi a fel lo a, a khat tawkin buaina a chhuak fo. Assam khawpui lian zawkte nena buaina pawh ni lo, ramria khaw te reuh te te-a mi ṭhenkhatte buaina siam avangin a state pumin kan tuar a, ramri hrula awm khuain an duh hun huna an dan theih ang maiin Mizoram state hi a awm mek a, a zialo hle a ni.
Tun hnaiah kohhran hruaitu lam leh khawtlang hruaitute'n Chief Minister an hmu a, ramri chungchang an sawipui ve ve hi thil lawmawm tak a ni. Tunah tak chuan kan ramri hauh chhungah hian Assam lam mi tam tak an cheng mek a; tun hnaia 'ramri buaina' kan tihte kha chu Mizoram chhunga thleng vek niin a ngaih theih hial a, Assam, hian nasa takin min nek mek a ni.
A nihna takah chuan kum 2019-a Mizoram sorkar Council of Minister ṭhukhawmin 'kan ramri' tia a pawm chu Bengal Eastern Frontier Regulations, 1873 tlawhchhana siam Inner Line Regulation, 1875 kha a ni. Tun hnaia 'ramri buai' kan tih tak kan ram chhunga Assam lamin min nêk avanga buaina chhuahna bul hnaia sipai duty post siam belh ringawt hian awmzia a nei thui dawn lo a, mahni ramria a pawm chin humhalh tum hian sorkarin eng chen nge ke a pen tak tak tih hi hriat a chakawm hle a ni.
Ramri buai chinfel hi thil awlsam a ni lo a, ramri buai chinfel tuma hmalakna tak tak pawh sawi tur a la awm meuh lo. Tun hnaiah kha chuan state pahnih inkar ramria buaina chhuak chinfel ringawt kha sorkar laipui tum leh keini state pawhin kan lo pawm ve tak kha a ni a; buaina chhuak chinfel lam ni lo, a ramri buaia tak chinfel hlan hi a nghahhlelhawm hle a ni.