Covid-19 test kalpui dan

Health & Family Welfare Department Special Secretary chuan thuchhuah siamin Disaster Management and Rehabilitation-in April ni 30-a order a chhuah, Community spread dinhmun chhui nana random testing neih tura a tih chu community spread a awm tawh tih a chian avangin tihtawp a nih thu May thla tir khan a tarlang. Media lama interview-ah Medical Operation Team chairman chuan randon test kalpui a nih chuan positive hmuh chhuah a tam ang a, enkawlna tur lamah buaina a awm theih avangin randam test kalpui loh a nih thu a sawi.

Hetihlai mek hian tun hnai khan Aizawl khawpuiah bialtu MLA rawt angin Health department hriat­puinain private hospital pakhat chuan veng pakhatah a hlawma test kalpui a nih thu sorkar thuchhuah chuan a tarlang. Covid-19 positive tamna leh hripui tuar nasa venga hetianga test kalpui theih a ni hi a lawmawm takzet a, hetiang hian a hlawma a nawlpuia test hi kalpui theih chu ni se hripui leng kan donaah pawh hian awmzia a nei thei ngeiin a rinawm.

Tunah hi chuan Covid-19 positive-te nena inhnaiha awm (positive contact) chin leh mahni inringhlel (symptom nei) chin hi test an ni deuh tlangpui a, hetiang mite'n hri an vei nge vei lo tih hriat chhuah a nih meuh chuan a lo tlai tawh fo a ni. Hei vang hian mipui nawlpuiin hri an vei nge vei lo endik danah a nawlpuia test kalpui theih dan hi chu awm se duhthusam a ni a, chu chu hri darh zel tur venna kawngah a ṭangkai bawk ang.

Random test kalpui a nih loh chhan hi vantlanga a darh tawh vang niin sorkar lam chuan an sawi a, vantlanga a darh tawh avang zawk hian random test hi kalpui theih chu ni se a ṭhat zawk hmel. Hetihlai hian hripui vei thei dinmuna ding (primary contact) leh mahni inringhlelte ni lo a hlawma test tur hian sum a ngai hnem em em a, hei hi sorkar buaina tak pawh a nih hmel. Chumi piah lamah positive hi a hlawma hmuh chhuah an nih chuan a enkawlna thlengin kan buai dawn tih MOT chairman ngeiin media hmaah zêp loin a lo sawi tawh bawk a ni.

Tuna kan kalpui dan anga containment area chhunga hripui vei dap chhuah hna kalpui mek hi Health department hian chhunzawm zel se, he mi piah lamah sorkar pawisain a daih a nih chuan mipui nawlpui test kalpui theih dan zawn thuai ni bawk se a lawmawm hle ang.