Sorkar hnathawkte pawisa thawhin Covid-19 vanga mirethei tanpui ni se

Mizoram sorkar hnathawk pawl hrang hrang intel khawm, Federation of Mizoram Government Employees & Workers (FMGEW) chuan sorkar hnathawkte'n Covid-19 dona atan an hlawh aṭanga an thawh khawm cheng nuai 300 chu tun hnai khan Chief Minister's Relief Fund for Covid-19-ah an pe.

Sorkar hnathawkte'n an hlawh aṭanga hripui dona tura sum ṭhahnem tak an chhung lut hi a lawmawm takzet a, sorkarin harsatna a tawh laia ram tana an sum leh pai an thawh phal hi a ropui hle a ni. He hripui hian hun, tha leh sum a hreh em em mai a, sorkar lam pawhin theihtawp an chhuah chungin an tlin chin chu tuna kan thlen chin hi a ni a, chuvangin sum lama puih pawh an ngai hle reng a ni.

CMRF-ah hian mimal leh pawl hrang hrangin sum an chhung lut thahnhem tawh hle a, tunah hian vel a awm mek a ni. hengte hia hmanna tur zawn chuan a indaih lo hle ang tih a chiang a, chutih rual chuan he pawisa hlawma lut bik hi Covid-19 inkharkhipna avanga sum leh paia harsatna tawkte tana sem chhuah theih ni se a lawmawm ngawt ang.

Sum hi chu a hmanna tur hi a awm zel a, awmze nei taka a hmanna tur bik siam fel sa a nih erawh chuan thil dang atan kan awt lo mai ṭhin. Tuna a hlawma sum ṭhahnem tak lut, cheng nuai 300 zet hi chu miretheite chhawmdawlna atan pek chhuah theih ni se, 'sorkar hnathawkte'n an hlawh aṭangin sorkar hnathawk ve lo miretheite an ṭanpui' ti pawhin a kal thei ang a, thil mawi leh remchang tak a ni thei ang - tunah hian khawpuia chhungkaw tam tak hian thla hnih zet chu sum lakluh an nei tawh miah lo a, an mangang takzet tawh a ni.

CMRF hmanna tur reltu committee hi an awm a, anni hian sum hmanna tur tam tak awm zingah hian FMGEW-te thawh pawisa hlawm lian tham hi miretheite chhawmdawlna atan bik serh hrang thei se, chuti ni loa sorkar damdawi-in hmanraw leina atante an hman leh chuan mipui an phun leh palh ang e.