Sikul leh college admission
HSLC leh HSSLC exam result chu tihchhuah a ni ta a, pass percentage a san bakah zirlaite a nawlpuiin an tiṭha hle. Heng zirlai zinga a tam zawk hian Mizorama Higher Secondary School leh college hrang hrangah admission an zawng dawn a, hripui leng avangin state pawna admission tih tum pawh kum dang aia a tlem a rinawm.
HSLC leh HSSLC seat awm zat leh pass zat en hian admission tihna lamah harsatna a thleng thei hialin a rinawm a, pass zat leh an zir zawm zelna tura seat awm zat hi a inmil tawk loh chuan a buaithlak hle ang. Tun apangin sorkar sikul lamin harsatna an tawk der tawh niin an sawi a, hei hi uluk taka vil a nih loh chuan zirlai tam tak hmakhua tichhe thei hial pawh a ni awm e.
HSLC exam result a ṭhat em avangin kum dang zawng aiin distinction-a pass thei chin pawh an ṭhahnem a, hei hian pawl 11 an zir zawmna tur lamah harsatna a siam niin an sawi. Sorkar sikul ṭhenkhatah chuan zirtirtute'n admission tur pawh tifel hleithei loin thuneitu sang lam an inrawlh tih thawmte a awm a, a zialo hle a ni. Naupang zirna chhunzawm zel dan turah hian merit-a kalpui theih loh tur khawpa duhsak zawng thun tuma thuneitu sang an inrawlh a nih ngat chuan zirna tichhe theitu zingah an tel tihna a ni a, a zialo hle a ni.
Tun hmain 'quota' tiin college admission thlengin insawipuiin awmzia a nei ṭhin a, zirlaite'n an phu ngei nia an hriat zirna in an chan loh phah fo a, hei hi a pawi hle. Danin quota system a siamsak piah lama quota hran siam tumna a awm a nih chuan tihtawp ni se, zirlaite zirna chhunzawmna kawngah hi chuan a tehna berah thiamna (merit) hi hman ni thei se a lawmawm hle ang. Zirlai pawlte pawhin merit ni lo tehfung dang hmangtute hi khap ngam se, anmahni ngei pawhin duhsak zawngte thun tumin hma la lo ngam se a ṭha hle ang.
Mizorama pawl lian Central YMA pawhin 'zirna uar kum' a puang hial a, he zirna uar kumah hian pawl 11 leh college admission kalpui dan hi vil ngun a ngai a, heng thilah hian dikna aia duhsak zawnga thil kalpui a nih chuan zirna uar kan tum dan pawh a kal fuh lo thei dawn a, CYMA tan pawh tun hi huaisen hun a ni e.