RT-PCR bun a harsa em?

BJP, Mizoram Pradesh hruai­tute chuan Mizoram sorkarin RT-PCR khawl bun a harsa anga an sawi chu thudik tawk lo a nih thu sawiin khawl bun hi a harsa lo tih an finfiah niin an insawi a; ZMC-in hun rei tak an hawhsak tawh College of Veterinary and Animal Husbandry (Vety College), Selesiha RT-PCR an hman dante tun hnaiah an enfiah a, "RT-PCR hi room zau pangngai ve deuhah chuan harsa lo taka bun mai theih niin a lang," an ti.

Tunlaia Mizo­rama thu inchuh lian tak mai chu RT-PCR khawl bun dan chung­chang hi a ni a, Lung­leia hman tura eptu MLA pakhatin RT-PCR khawl a pek chu laboratory siam a harsat vangin din a la ni lo tiin sorkar lamin an sawi. Hemi hnu hian chhim lam tana RT-PCR khawl bun duhtu pawlte chu High Court-ah an zualko a, Court-a he thu ngaihtuah a nih hnu lawk hian Mizoram sorkar chuan laboratory dinna tur hmun an 'lai ṭan' a, hei hi Health Minister pawhin a tarlang nghe nghe a ni.

Lunglei mipuite tana RT-PCR khawl dahna tur hi Mizoram sorkarin 'mithiam' tia a thlan chhuahte'n kum 2020 June-ah khan an va endik tawh a, heng mithiamte endikna hi pawm ni lo anga puh theih turin kum khat hnuah Mizoram sorkar aiawh chuan a sawifiah.

Mizoram sorkar lam aṭang hi chuan RT-PCR khawl bun harsatna lam deuh hlir sawi chhuah a nihlaiin BJP, Mizoramte chuan Selesih-a Very hmuna RT-PCR khawl dahna an endik a, thil harsa niin an ngai lo. Hei mai hi a ni lo a, kan state ṭhenawmah pawh laboratory hi hun rei lo te chhungin an bun zung zung thei a, laboratory building sa kher loin a awm sa an thuam ṭhaa an hmang mai niin a lang.

Mizoram sorkarin RT-PCR khawl bun harsatzia vawi tam a sawi tawh a, hetihlai hian ṭhenawm state-te chuan a harsatna lam sawi lem loin khawl an bun mai zel. Selesih-a RT-PCR khawl an hmanna hmun ngeia kalte pawhin a harsat hmel loh thu an sawi a, eng ber hi nge rin tur tih hriat a harsa khawp mai.