Bill pe thei lote hriatthiam an ngai

Public Health Engineering (PHE) department chuan, "Inkharkhipna kal­pui chhung hian Mizo­ram sorkar chuan mipuite tui nghei a phal dawn lo a, dan anga thla thum chhung tui bill pe remchang thei lo pawh ni se, an connection titawp rih lo turin hma a la mek a ni," an ti a; dan anga thla thum chhung tui bill pe thei loAizawla tui connection tihtawp lailawkte leh online-a tui bill pe thei lote titawp (disconnect) lo tura hma an lak mek thu an sawi.

Hripui lengin Mizoram pum na takin a nghawng mek a, chu'ng zinga a nghawng nat ber nia lang chu khawpuia cheng mirethei zawk (urban poor) hi an nih hmel. Thingtlang lamahte chuan nitin hnathawh tibuai loin inkaihhruaina pawh kalpui a ni a, khawpuiah erawh chuan a thlaa thla lockdown puan a ni a, chhungkaw tam takin sum lakluh an nei lo a ni ber mai.

Hetihlaia thla thum chhung a zawna tui bill pe thei lote dan anga an connection tihtawp a nih chuan sorkarin khawpuia miharsa zawkte tawrhna a belhchhah ang hiala ngaih theih a ni dawn a, tuna ruahmanna thar siama heng mite tana remchang a siam hi a lawmawm hle a ni. Hetihlai hian sum neih loh vang pawh ni lem lo, ngaihthah leh chhan dang avanga tui bill pe lo hrim hrim an awm a nih chuan thil ṭha lo tak a ni thung ang.

Hripui leng hian kan khawsak phung nasa takin a tibuai a, sum lakluh tlahniam ta an awmlaiin sum lakuh reng reng nei ta lo chhungkaw tam tak an awm tih hi sorkar lam pawhin an hriatthiam a ṭha. An eizawnna ber chhunzawm theih loha a awm avangin inkharkhip laiin eizawnna dang dap ngaihna a awm lo a, chhungkaw tam tak hi an rûm takzet a, chutihlaia an tui connection lo tihtawpte phei chu a sawia sawi rik loh chi a nih zawk hmel e.