Ramria khuate mawhphurhna a sâng

Champhai district bawrhsap hoin tun hnai khan Champhai district chhung, India leh Myanmar ramri kàia khaw hrang hranga inkhuahkhirhna leh a kaihhnawih kalpui dan tur sawiho a ni a, sorkar official leh khawtlang hruaitute an tel.Dan loa mihring lut leh chhuak leh, bungrua, ran leh ruihhlo tawlh a tam thu an tarlang a, "Khauh takin thukhat vuaa theihtawp chhuaha do tlan ni se," an ti.

Myanmar ramria chengte hi tun hnai­ah an hahin an thawk rim hle mai a, dan loa mihring lo lut tur leh an thil tawlh ruk turte ven a ngaih bakah hripui leng kara chet a ṭul avangin an buai hle ang tih a chiang. Hetihlai hian anni hian ṭan an lak loh chuan kawng hrang hrangin kan ramin harsatna a tawk thei a, ramria khuate thawhrim zar hi Mizoram hian a zo ṭhin a ni.

Tun hnaiah Myanmar tual­chhung buaina avangin raltlan an lo lut nual a, heng hi chu dan chi an ni lo a, lawm taka lo dawnsawn chi an ni a, hei hi ramria khuate tih dan pawh a ni. Hetihlai hian dan loa ruihhlo leh ralthuam tawlh rutute an lo inrawlh ṭhin a, dan loa thil dang tawlh ching an awm tel tlat avang hian chet lak pawh a khirh hle ang.

Heng thilte lo do lêt tur hian khaw hrang hrang an inthurual a ngai a, inthlahdah deuh bik emaw khauh fâl leh lutuk bik emaw an awm chuan buai phah theih a ni a, an ṭhutkhawma an thurel "Khauh takin thukhat vuaa theihtawp chhuaha do tlan ni se," tih hi chak takin bawhzui tlang thei se a lawmawm ang.