Thingtlang mite ṭanpuina pek

Tun hnaiah Covid-19 avangin Mizoram hmun hrang hrangah containment zone-te siam niin hnathawk thei loin chhungkaw tam tak khung an ni a, hei bakah hian khawpui lamah thla hnih zet lockdown kalpui a nih tawh avangin chhungkaw tam takin ei leh barah harsatna an tawk a, heng mite tan hian thingtlang khaw ṭhenkhatin an thlai leh ei tur dang tharte a thlawnin an pe ṭhin a ni.

Hun harsa karah Mizo nun ze mawi a takin a lang chhuak leh mek a, phût lêt leh beisei lêt engmah nei loin ṭanpui ngaite ṭanpui turin an pen chhuak a ni ber mai. Khaw tam tak hian an neih chuang liam aṭangin an pe hauh lo a, an lo leh huana an ei tur neih ṭhatte leh a ṭhente chu ramhnuai hmun hla tak taka mi an lak khawmte a ni a, heng hi khawpui mite tan an pe chhuak a, a ropui hle.

Kan hun tawn mek en hian eng chen nge hnathawk thei loin chhungkaw tam tak hi khung an nih dawn a sawi theih loh a, hnathawh theih hun inher chhuak pawh ni se chhungkaw ṭhenkhat hi chuan an eizawnna an chân tawh a, eizawnna thar an dap a ngai dawn. He hun harsa takah hian khawpuia miretheite hian ṭanpui an ngai a, chumi hre fuhtu thing­tlang mite an fakawm takzet a ni.

Thingtlang mite'n khawpui mite tana duhsakna an lantir hi khawpui lam hian hre reng se, beisei lêt nei hauh loa an rawn pen chhuah avang tak hian hriatreng an phu a, a pui theitu dinhmuna an din ve hunah heng mite hi theihnghilh loh an ṭha ang.