Ruihhlo do

Vawiin, June 26 hi khawvel puma ruihhlo do ni - Interna­tional Day against Drug Abuse and Illicit Trafficking - a ni a, he ni hi kum 1989 aṭanga hman ṭan niin kumina thupui atan 'Share Facts On Drugs, Save Lives' tih a ni.

Ruihhlo hian khaw­vel pumah har­satna a thlen a, hetih­lai hian ruihhlo avanga buai zual bik ram an awm. India ram chhungah pawh ruihhloin a tihbuai nasat bik state an awm a, heng zingah hian vanduaithlak takin Mizoram pawh a tel.

Mizoramah hian khaw chhak lam aṭangin ruihhlo hi nasa takin a lo lut thei a, a ruh langa kan sawi duh chuan zalen takin a lut reng a tih theih hial awm e. Hei bakah hian kan ṭhenawm state-te aṭangin damdawi hman sual theih chi nasa takin lakluh a ni reng bawk a, Mizorama sorkar dan anga damdawi zuar ṭhenkhatte pawhin damdawi ruih theih chi hi doctor lehkha nei lo ṭhalaite hnenah an hralh ve ṭhin bawk.

Hei hi tuna kan ram dinhmun dik tak a ni a, ruihhlo hian nasa takin kan chhungkua a tibuai a, kan ṭhalaite nun a lain harsatna nasa tak a thlen mek a ni.

Ruihhlo do tur hian sorkarin ṭan a la a, tlawmngai pawlte'n theihtawp an chhuah a, kohhran pawhin nasa takin ke a pen a, chuti chunga kan ram dinhmun chu kan hriat tlan angin ruihhlo vangin a la buai hle a ni. Ṭhalai zingah ruihhlo ti an pung zel emaw tih mai tur a ni a, kan la thihpui mek reng bawk a, kan la tuar dawn chauh a ni palh ang tih pawh hlauhawm tak a ni ta.

He dinhmun harsa taka kan din chhan hi puh tur zawn dawn chuan puh tur tam tak a awm thei ang a, chu lam chu dahṭha ila, ruihhlo do turin i ṭang rual thar ang u.

Sorkar theihna chin kan hria a, kohhranin a tih theih chin pawh kan hria a, tlawmngai pawlte ṭanlaknain awmzia a neih theih dan thlengin kan hre vek tawh a; hawh u, ruihhlo do turin puan ven sawi chhingin Mizo mipuite i ṭang rual thar leh ang u.