Mipui sum eirukna eirawngbawlna gas

Champhaia Legal Metrology enforcement staff-te chuan tun hnai khan Mizofed Gas Agency, Champhaia dah tur eirawngbawlna gas bur 306 an endik a, buk tling lo bur 77 an hmu chhuak.

Mizoram ni lo state dang­ah hian eirawng­bawlna gas buk tling lo awm ṭhin vanga buaina hi a awm ve a nih pawhin chutianga an buai thawm erawh hriat a ni ngai lo a, Mizoram chhungah hian kan buai rei ta hle thung. Eirawngbawlna gas tihchingpen hian Mizote hi nasa takin min tibuai a, kan sum tam tham tak a luang ral a, a bûk tling loa gas kan lei avang hian sum tam tak kan hloh a, mipuite rawkna dik tak a ni.

Central YMA pawhin hei hi hrain tihtawp tumin beihpui a thlak a, an tihchingpenna hmunpui nia hriatte pawh luh chilhin an man chhuak fo tawh a; nimahsela mahni eizawnna ni lo tlawmngaia thawk an nih avangin an vil reng hman bik lo a, a vengtu lam an awm lo tih an hriat hi chuan hetiang khawih chingpentute hian zalen takin kan thil lei tur hi min rawk ṭhensak ṭhin a ni ber a, a pawi hle a ni.

Eirawngbawlna gas tihchingpen tur ven hi thil harsa tak angin lang mah se thil ven theih loh a ni lo a, Legal Metrology enforcement staff lam hi an indaih lo deuh a nih pawh­in sorkar hian anni puitu tur hi a ruahman thei a; thla eng emaw zat mar taka sorkarin ṭan a la thei a nih ngat chuan mirethei berte thlenga rawkna lian tak eirawngbawlna gas tihchingpen hi tihtawp theih a nih a beiseiawm.