Lunglei damdawi-in thu leh hla hi

Civil Hospital, Lungleia bun tura MLA pakhatin RT-PCR khawl a pek chu sorkarin a bun mai loh avangin miṭhahnemngaite'n PIL thehlutin High Court-ah an thlen a, he mi thu kal zelah hian Civil Hospital Medical Superintendent chuan RT-PCR supplier leh a siamtu company engineer-te nen an inbiak pawh reng thu a sawi. Mizoram sorkar chuan RT-PCR khawl bun theihna tur laboratory dinna tur building sa turin a hmun tur a lai ṭan mek bawk.

Thawhhona ṭha ber nen pawha do hneh harsa tak tur hripuiin khawvel a tuam mek a, India ram a nuai na zual emaw tih tur a ni a, tun hnaiah India hmar chhakin kan tuar na hle bawk. He hripui do tur hian thawhhona ṭha a pawimawh tehlul nen kan hotute thu kalpui dan en hi chuan thil hi politics zawngin an herpui ta emaw chu tih mai tur a ni a, chumi tuartu chu mipui lam an ni ta hi a pawi hle a ni.

RT-PCR khawl petu hi ruling lam MLA chu ni se tun ang hian thil hi a kal kual lo hialin a rin theih ta rum rum a, building awm saa khawl bun theih dan 'mithiam' tia sorkar mi tirhte'n an en tawh pawh 'mithiam dangte'n' an pawm lo chu a ni ta deuh ber a; tuna khawl mamawh tawh dahna tur in sakna tur an lai ṭan chauh maite hi chhim lam mipui zah lohna a kawk thei lek lek mai.

High Court-ah thu a lut tawh a, chumi hnu lawka chawpchilh taka laboratory dinna tur an lei chawp nia puh tura thil a kalte hi a zia lo a, RT-PCR khawl supply-tu lam leh an engineer-te nena 'inbiak pawh reng' ringawt pawh hi a khawl bunna tur dahna tur in sakna tur an la lai chauh a nih phei chuan a sawt lo ang tih hlauhawm tak a ni.

Politics-ah chuan ṭan lam kan lo nei a nih pawhin hri dona kalpui danah hi chuan politics-a kan hawi lam hi dah ṭha thei ila. Lunglei damdawi-ina khawl bun theih dan leh harsat dan kan sawi kual chiam dan en hi chuan kan ram hruaitute hian mipui hriselna leh himna aiin political party hi an dah lal a ang a, a pawi takzet a ni.