Remna Ni

Vawiin, June 30 hi India sorkar leh MNF-in kum 1986-a inremna an siam ni champhaphak a ni a; remna thuthlungah hian MNF aiawhin president Laldenga, India sorkar aiawhin Union Home Secretary RD Pradhan leh Mizoram sorkar aiawhin chief secretary Lalkhama-ten hming an ziak a ni.

Remna Ni a lo thlen hian Mizorama chengte inunauna leh inpum­khatna ṭha zawk kan neih theihna tura infuihna ni nih a inhmeh teh­lul nen, hun rei tak chhung chu poli­tical party lamin hamṭhatna chuhin he ni-ah hian inhnialna an chawk chhuak a, inremlohna niah an hmang fo. Party politics aṭanga thlira kan sawi duh dan ang zelin he ni hi kan fakin kan sawisel a, hei hian he ni hlutna thlengin a nghawng palh ang tih hlauhawm khawpin inhnialna a chawk chhuak ṭhin.

Kan thlirna tarmit azirin he ni hi chu kil hrang hrang aṭangin kan thlir thei a, chumi kan sawi chhuah duh dan chuan midangte lawmna a thlen theih rualin midangte rilru tinatu pawh a chang palh thei. Hei vang hian he ni a lo thlen hian political party-te leh an mi leh sate bakah mitin kan invena kan insum tlan a ngai a, kan ngaihdan kan sawi chhuahte hi inremna tinghettu leh tuna kan chenhonaa remna thlen tur lam hawi zawng a nih lem loh chuan ngawih chuh thiam a ṭha ang.

Ram buailaia kan dinhmun hre phak tan chuan he ni hlut­na hi a zual a, mipui tawrhna nasa tak thlengte leh ram hmasawnna thlenga a tawrh dan ngaihtuah phei chuan remna leh muanna lo thleng ta hi thil lawmawm tak a ni.

Kumin hi Covid-19 hri leng avangin Remna Ni hi lawm a remchang lo a, he ni hi sorkarin chawlha a puan ang ngei hian a phu anga lawm thiam a pawimawh. Kan sawi duh dan leh kan thlirna chu eng ang pawh ni se, Remna Ni hi Mizote tana ni hlu ber zinga mi a ni kumkhua tawh dawn a ni.