Chhuah phal loh chunga inkhelh phal!

Mizoram State Disaster Management Authority chuan June 30 leh July 15 inkara hman tur Covid-19 hri leng mek avanga inkaihhruaina thar a tichhuak a, eizawnna leh ṭul bik thilah lo chuan veivah leh inlen pawh phal a ni lo a, office kai tur leh phalna nei bak chu mahni in chhuahsan phal a nih loh laiin indoor leh outdoor-ah inkhelh (sports practice) phal a ni.

Tun ṭuma inkaih­hruaina chhuak tur hi mipuiin an châng ṭhup a, thla hnih chuang zet hnathawk thei loa mipui nawlpui an awm tawh hnuah hri leng a la ziaawm thei si lo a, sorkar lamin eng ang takin nge inkaihhruaina a kalpui dawn tih an ngaichang a, sorkarin a phalsak zinga inkhelh a tel mai hian sawi a hlawh hle. Thil dangah khauh takin inkaihhruaina siam a ni a, ṭul bik thila chhuak tur tan pawha LLTF/ VLTF hriatpuina neih a ṭul laia a loa kan awm theih inkhelh phalsak a ni hi chu ngaihtuah nawn leh a ṭha khawp mai.

Tuna ruahmanna tharah hian a loa kan awm theih loh bungraw load leh unload-te pawh mipui reh hun zan dar 7:30 leh zing dar 4:00 inkarah chauh phal a ni a, mi ṭhahnem tak eizawnna dawrte pawh hawn hun bi khauh takin kar khatah a ni bik siamsak an ni. Sikul kal leh biak-ina inkhawm pawh a la remchang lo a, mi ṭhahnem tak eizawnna restaurant hawn phal a la ni lo a, sorkar hnathawk zinga Group B hnuai lam chin chu hlawh la reng chung siin a zatve aia tam hnathawk lo tura tih an la ni. Mitthi inah meuh pawh mi 30 aia tam punkhawm phal a la nih loh laia sports practice tura mi 25 chin an phalsak ta mai hi chu thil inhmeh lo tak a ni.

"He mi hun chhung hian eizawnna leh ṭul bik thil ni loa veivah leh inlen pawh khap tlat a ni. Office kai tur leh phalna neite bak chu tumahin mahni in/ compound an chhuahsan tur a ni lova, building khata in hrang hrang luahte pawh intlawh­pawh loh tur a ni," tih hi sorkar ruahmanna siam a ni. Chuti chunga inkhelh an rem ti hian ngaihtuah a tithui a; inkaihhruaina duangtu sorkar hotu lamah indoor lama inkhelh duh tawh an awm vang tia an puhte hi a tak a ni palh mai ang tih a hlauhawm ta rum rum mai. Zing leh tlaia insawizawina (exercise) hun rem­chang an siamah hian duhtawk thei se, inkhel tura punkhawm hi Covid Appropraite Behaviour bawhchhiatna remchang siamsakna mai niin a lang.

Tuna kan rama Covid-19 hri len dan hi thih leh dam chung­chang a la ni a, hri hi a la pung zel a ni. Hetiang hi ni mah se loh theih loha eizawnna kalpui a ṭul tawh avangin inkharkhip bur a remchang tawh lo a, chutihlaia indoor leh outdoor lama inkhelh theih dan ruahmanna siam hi chu an hmanhmawh hret niin a lang. 'Ṭul bik thil ni loa in chhuahsan phal loh' tih duang­tute hian indoor leh outdoor-a inkhelh phal hi chu an ennawn leh ngei i beisei ang.