Ramri buaina

Tun hnaiah Assam Police-te Vairengte daia Mizoram chhung chinah inkhuar tumin an rawn lut a, Mizoram sorkar pawhin police-te tir nghalin Assam police-te lo dang tur hian an kal a, ramriah buaina lian tham chhuak rih lo mah se boruak a ṭang hle a ni.

Assam leh Mizoram ramri hi chinfel loha a awm avang hian buaina tenau hi a khat tawkin a chhuak reng a, kan la buai chhunzawm zel dawn pawh a ni maithei. Nikum lam khan Assam mite hian Mizoram chhunga lirthei lut turte dang­in harsatna min siam­sak a, thuneitu lam ruahmanna siam angin ramria buaina chhuak hi chu chinfel a ni; nimahsela 'ramri buaina' tak hi chu an ching fel lo mai ni loin ngaihtuah pawh a ni ta lo.

Tunah ramriah buaina a inmun leh ta a, hei hi ramri chin kan tihfel ngam loh vang a ni ber. Mizoramin kan ramri dik tak nia kan ngaih leh Assam-in an ramria an pawm hi a inang lo a, heti a nih chuan buai zel hi kan hmabak niin a lang. Kan sorkar chuan Council of Minister meeting meuhah kan ramri pawm chin hi Bengal Eastern Frontier Regulation 1875-in a sawi chin a ti a; nimahsela hei hi a takin kan hauh ngam lo a, chu mai ni loin kan ramri chhungah pawh thûk tak thlengin Assam hian min nawr tawm zel a ni ta ber mai.

He ramri buaina chingfel tur hian Vairengte daia minister leh MLA zuk chhuak hian awmzia a nei lem lo a, police-te duty post sak pawh hi ramri chinfelna a ni lo tih kan hre chiang chho zel. Ramri buaina chingfel tur chuan state pahnih hotute an inbiak a ngai a, hotu lute inbiak thu hriat tur awm si loa police inep thu hriat hi chu ramri buaina kan la chingfel mai dawn lo niin a lang.

Sorkar tan hian ramri buai chinfel hi thil awlai a ni lo, a harsatzia hi mipui pawhin hriatthiam­pui ila, haw hawa nawr a sawt loh tluk zetin kan police-te fuihtu ni awma kan politcian-te zuk zin thla sek pawh hi a sawt kher lo ang. Kan sorkar hian ramri buai hi a ngaimawh a nih tak tak chuan Assam sorkar nen hian inbiak dan dap se, sorkar aiawha sorkar official-te inbiak ringawt hian buaina hi a chingfel dawn lo a, police-te duty post sawn hlat zawnga ṭanlak phei chu a sawt lo lehzual awm e.