Ramri kan vei a nih chuan Sorkar hotute inbe rawh se

Serlui bialtu MLA chuan Vairengte daiah Mizoramin a la luah ngai loh ram luahin an chei bawl mek niin a sawi a. Kum 2019 leh 2020-a ramria buaina chhuakah Assam mite chu kilometre 1 vel kan nawr let tiin, "Chief minster Pu Zoramthanga kaihhruai MNF sorkar chu ṭhenawm state-te nen ramri buaina a awm a nih pawhin tlawm zawk leh hnungtawlh zawkah ṭan kan tum lo," a ti.

Mizoram sorkar hian "Kan ramri" ti a pawm chin chu Vairengte dai mai hi a ni lo a, chumi aia thlang daih 1875-a ramri duan tawh a ni a, hei hi Council of Minister ṭhukhawmin kum 2019 July-ah khan a lo pawm tawh a ni. Heti a nih laia Vairengte daia Assam nen kan innawr hnua tlem tlema kan ram kan zauh zel anga sawia lo hlim viau hi a inhmeh lo a, kan sorkar hotute ngeiin 'Kan ram' tia an chhal chu kan kawk ngam lo mai a ni lo a, Vairengte daiah mai pawh Assam-in min rawn nawr tawm reng a ni ta ber mai.

Kan dinhmun dik tak hi kan thlir chuan kan ram chhungah Assam-in min rawn tibuai a, kan ram chhungah vek kan nawr tawm reng châng a awm a, kan ram chhungah vek kan tlanchhiat châng a awm. Keini lamin kan ram china kan hauh phei hi chu kan kal thleng ngai tawh lo a, Assam-in an ram chin nia an kawh thleng rawn thlen tumin kan ram chhungah thûk zawka rawn luh an tum a, chumi kan lo danna lama tlema an hnungtawlh pawhin kan politician ṭhenkhat chuan hnehna chang ang hrimin an sawi duh ta zel a ang - hei hi kum 2019-a Council of Minister-in kan rama a pawm nen chuan thil inkalh tlat a ni.

Hei vang tak hian ramria buaina hi tute mahin politics-a hamṭhatna atan hman tum tawh lo se, Assam an tawlh hret avangin party hming ṭhat chuh lo ila, Assam-in min nawr avang pawhin ruling party dem chiam loh zir thiam a ṭha ang. Kan state ṭhenawmte nen hian ramri buaina hi kan la nei dawn chauh a ni mai thei a, police duty level-a chinfel theih a ni lo a, ramri khuate intual vuaka huaisen zawk avangin ramri hi kham theih a ni mai lo, a buailai district-a DC-te inbiaknaa tihfel theih pawh a ni hek lo; sorkar hotu lian chinte an indawr a ṭul.

Sorkar hotu lute an indawr duh miah loh laia state pahnih police-te silaia intin leh ramria innawr tawm chhawk vel hi hnehna leh tlawmna a tling lo a, kan sorkar hotu liante ramri chingfel tura an indawr duh lo a nih chuan ramri buaina hi an vei tak tak lo a ni thei zawk ang.