Sorkar bawhzui dan thlir a ni ang

Covid-19 hri leng chung­changah tun hnai khan Chief minister hoin political party leh pawl hrang hrang hruaitute an inrawn khawm a. Hri leng chungchang leh a dona kawnga hmalak dan turte sawiho a ni a, henga an thusawite hi sorkarin a ṭul anga a bawhzui tura dah a ni.

Kal khawmte thusawiah hian sorkar demna lam ngawr ngawr ni lo, rawtna fing tak takte leh sorkar hmalakna duhkhawp lohna te pawh sawi lan a ni a, hei bakah hian sorkar thil tihṭhatna kawnga fakna lamte pawh a awm tho a; sorkar aiawh lamte pawhin an hmalaknaa duh­khawp lohna lai awmte an pha bik lo a, mipui ṭanrualna zara hri dona kawnga a tihṭhatte pawh an sawi.

Hri do kawnga kan che ṭha deuha a lan ṭumin sorkar lam hian anmahni infakna hi an sawi chhuak thuai a, kan dinhmun a harsa deuh a, "Mipui thuawih loh vang," tia puh mai duhtute thlengin kan hotute zingah an awm. Tuna kan dinhmun en chuan hri dona kawngah hian mipui vantlang tha thawh hi tel lo se sorkar tha leh chakna hmang ringawta do hneh chi pawh a ni lo; kan ṭanrual fe hnuah pawh tun hi kan thlen chin a la ni ta chauh zawk a ni.

Tun aia ṭha zawka hri ka do theih dan tur te, he hri laka kan fihlim zawk theihna turte leh hri leng avanga harsatna tawkte chhawmdawl dan tur thlenga rawtna ṭha tak tak lutte kha sorkarin a takin bawhzui tum se a ṭha khawp mai.

Heng inkoh­khawma thu ṭha tak tak sawite hi sorkarin a bawhzui loh chuan kha inrawn khawmna kha a hming maia inhmukhawm ve mai mai a chang thei a; chutihlaiin sorkarin an thu­sawite kha a ngai pawimawh tak taka ṭha taka an bawhzui erawh chuan inrawn khawmna pawimawh leh awmze nei tak a ni dawn a, mipuiin sorkar chet zui dan an ngaichang reng dawn a ni.