CM pahnih inbe rawh se

Mizoram leh Assam ramri chungchangah Assam chief minister Himanta Biswa Sarma chuan Mizoram chief minister Zoramthanga hnenah lehkha a thawn a, ramri chungchangah Assam-in tihdik loh an neih loh thu leh an state ramri an humhim thu a ziak a, state ṭhenawmte pawh an biak zel thu a sawi lang.

Assam Chief Minister lehkha aṭanga lang chiang tak chu anni lam hi chuan 1875 ramri ṭhen kha an pawm ve hauh lo tih hi a ni. Anni chuan Vairengte daia ramri hi an kawk chat a, chumi pel deka Mizoram lamin hnuhma an neih pawh na takin an nawr lêt nghal mai niin a lang. Heti a nih chuan kan coun­cil of minister-in kum 2019-a kan state ramri tia an pawm kha kan state hian kan humhalh ngam dawn lo a ang a, Assam-in an duh zawn an rawn kawh chin bak hi kan pêl thei dawn lo a ang ṭan ta hle.

Ramri buai hi silai hmeh puah leh tharum thawha pawng neka chinfel theih chu ni se kan state hotute hi an tlanchhiat bik a rinawm lo a; ram pakhat chhunga chengte hi silai hmanga ramri zauh theih a nih hmel loh avang leh a state pumin kan tawrh theih avangin zawl an dawh a nih i ring phawt ang. Kan sipaite inkahtir hi ramri buai chinfelna a ni lo a, ramri bawra buaina chhuaka 'chak zawk' anga kan lan deuh changa ruling party lo fak hmanhmawhte kha a atthlakzia kan hmu chiang chho ṭan mek niin a lang.

He thil hi political party thil mai mai a ni lo a, ram thil a nih avangin kan ram china kan hauh hi engtin nge kan neih theih ang tia beng sika ngaihtuah hun a ni. State pahnih sipai inkahtir hmanga chinfel theih a ni lo a, ramri hnaia cheng khuate intualvuak leh ram zauh tuma tharum hmanga tihfel theih pawh a nih hmel lo a, hotu liante an indawr a ngai.

Assam chief mi­nister-in lehkha a rawn thawn hmasa tawh a, kan chief minister hian dawh­kan khat kila ramri chungchang sawipui turin sawm se; political party thilah mah NEDA hnuaiah an inkawm fo tawh a, kan state ramri chinfel hi kan chief minister hian a ngai pawimawh a nih chuan NEDA-a a thawhpui Assam chief minister hi hmai chhanah ngei a biak a hun tawh a ni.

State hotu lute an inbiak hunah thu a inhmu thei lo a nih chuan court-a kal emaw, sorkar laipui lama zualko emaw, a kal zel dan tur ngaihtuah theih a la nih hmel. Tun dinhmunah hi chuan state pahnih hotu lute an inbiak a ngai a ni.