Zirna kalpui dan ngaihtuah

Covid-19 hri leng avanga sikul hawn theih loh chhunga zirna kalpui dan tura kaihhruaina siamtu tura din committee chu tun hnai khan an ṭhukhawm a, Mizorama zirna kalpui ṭan leh dan tur leh hripui leng hnuaia zirna kal dan turah rawtna an siam a, School Education Minister hnenah an thlen.

Hripui hian kan nunphung a khawih buai nasa hle a, chumi zinga a tuartu lian tak chu zirna hi a ni. Zirlaite'n zirna sikul an kai theih loh avangin in lama an zir theih dan ruahmanna siam a ni a, online class-te an kal a; nimahsela Mizoramah internet signal chhiat avangte leh phone/ laptop/ computer neih zawh loh avanga online class kal ve thei lo zirlai ṭhahnem tak an awm a, zirtirtu lamah online class pek harsat an awm ve bawk.

Zirna chhunzawm loa inkhung ringawt a ṭha lo tih hriaiin sorkar lam pawhin theihtawp a chhuah a, kum dang ang thoin board exam-te pawh kalpui a ni a, zawhna siam danah leh endik danah nasa taka ngaihhnathiamna a awm bawk avangin HSLC leh HSSLC lamah pawh pass percentage a sang hle. Hei hi zirlaite leh an nu leh pate tan tun dinhmunah lawmawm hle mah se, zir zelna tura harsatna siam thei a ni ve leh lawi si a, he hri hian zirlaite a sawi nasa hle a ni.

Hetihlai hian ka rama hri len dan en hian a ram puma sikul khar vekte pawh hi thil finthlak ber a ni lo mai thei a, hripui luh ve lohna leh tumahin an tlawh pawh loh khaw engemawzat a awm a, heng khuate hi a tlangpuiin khaw kilkhawr zawk leh online class kalpui harsat zualte an ni tel bawk a, heng khuaahte hian khauh taka inenkawl chungin khawtlang hruaitute nen ruahmanna siama sikul kal ṭan tawh pawh thil sual a ni kher lo ang.

Covid-19 avanga zirlai harsatna tawk mekte ṭanpui dan ngaihtuahtute'n ruahmanna hrang hrang an siamte hi hlawhtling thei ngei se, he hripui karah hian zirlaite'n bahlah lutuk loin zirna hi engti kawng emaw talin chhunzawm zel thei se a ṭha khawp mai.